“Lokomotiv” uchun qaynoq palla yaqinlashmoqda

“Temiryo'lchilar” uchun 25 iyuldan boshlab jiddiy bahslar start oladi desak mubolag'a bo'lmaydi.

Xabaringiz bor, “Lokomotiv” o'z oldiga katta maqsadlarni qo'ygan: jamoa o'zi ishtirok etayotgan barcha musobaqalarda g'olib bo'lishga harakat qilmoqda. Hozircha “Loko”ning ham Osiyo chempionlar ligasi, ham O'zbekiston chempionati va Kubogida qayd etayotgan natijalari chakki emas. Jamoa uchala frontda ham mag'lubiyatga uchramagan holda odimlamoqda.

25 iyul kuni bo'lib o'tadigan “Lokomotiv” – “Mashal” (O'zbekiston Kubogi, 1/4 final) javob bahsi bilan “temiryo'lchilar” qaynoq pallani boshlashadi. SHundan so'ng ketma-ket o'yinlar boshlanadi. Hisoblab chiqsak, “Lokomotiv” 25 iyuldan boshlab yaqin bir oy ichida sakkizta rasmiy o'yinda maydonga tushadi. Bu o'yinlardan bittasi O'zbekiston Kubogi, yana bittasi Osiyo chempionlar ligasi hamda qolgan oltitasi Oliy ligadan o'rin olgan bahslar.

Qizig'i shundaki, “temiryo'lchilar” qatorasiga dastlabki to'rtta bellashuvni o'z uylarida o'tkazishadi. Avvaliga “Mashal” bilan kuch sinashadigan jamoa keyinchalik TTYMI stadionida “Qizilqum”, “Navbahor” va “Andijon”ni qabul qiladi. Umuman olganda, jamoa yaqin bir oy ichida bo'ladigan sakkizta o'yindan beshtasini Toshkentda, qolgan uchtasini safarda o'tkazadi.

“Lokomotiv” safarda oliy liga doirasida “Neftchi” bilan “Mashal”, shuningdek Osiyo chempionlar ligasi o'yinida “Al Ayn” (BAA)ga qarshi kurash olib boradi. Biz “Loko” ishtirokidagi bellashuvlarga muxlislarni chorlab qolamiz hamda qaynoq palla boshlanayotgani munosabati bilan jamoa azolariga omad va zafarlar tilab qolamiz.

Quyida “Lokomotiv”ning iyul-avgust oylaridagi o'yinlarini keltirib o'tamiz.

25 iyul. O'zbekiston kubogi, 1/4 final javob uchrashuvi
“Lokomotiv” – “Mashal”

28 iyul. Oliy liga, 13-turning qoldirilgan o'yini
“Lokomotiv” – “Qizilqum”

3 avgust. Oliy liga, 16-tur.
“Lokomotiv” – “Navbahor”

8 avgust. Oliy liga, 17-tur.
“Lokomotiv” – “Andijon”

14 avgust. Oliy liga, 18-tur.
“Neftchi” – “Lokomotiv”

18 avgust. Oliy liga, 19-tur.
“Lokomotiv” – “So'g'diyona”

23 avgust. OCHL, 1/4 final dastlabki uchrashuv
“Al Ayn” – “Lokomotiv”

26 avgust. Oliy liga, 20-tur.
“Mashal” – “Lokomotiv”

“Lokomotiv” PFK matbuot xizmati.