“Metallurg” Jizzax sari yo'l oldi

Mazkur uchrashuv uchbu jamoalarning o'zaro 30-o'yini bo'ladi. Ortda qolgan 29 ta o'yinning 11 tasida bekobodliklar, 12 tasida esa jizzaxliklar zafar quchishgan. 6 ta o'yinda esa kuchlar teng kelgan. Kiritilgan va o'tkazib yuborilgan gollar farqi 44:40, “So'g'diyona” foydasiga.

Jamoalarning shu yil birinchi davrada Bekobodda o'tgan uchrashuvida mezbonlar 2:1 hisobida zafar quchgandi. “Metallurg” to'purari Zohid Abdullaevning ikki goliga Farrux SHotursunov bitta aniq zarbasi bilan javob qaytargandi. Ikkinchi davrada javob goli muallifi endi sobiq jamoasiga qarshi maydonga tushadi. SHotursunov bekobodliklar tarkibida “Bunyodkor”ga qarshi O'zbekiston kubogining chorak final, dastlabki o'yinida debyutini o'tkazdi va bekobodliklarning golida assistentlik qildi. Jizzax safariga “Metallurg” o'zining optimal tarkibida yo'l oldi. barcha futbolchilar salomat, jarohat olganlar ham safga qaytishdi. Safar oldidan “Metallurg” himoyachisi Islom Qobilov O'zbekiston U-19 jamoasida Toshkentda bo'lib o'tadigan xalqaro turnirda qatnashish uchun taklifnoma olganligini ham aytib o'tmoqchimiz.

Jamoalarning navbatdagi uchrashuvini tajribali hakam Hasan Ro'ziev boshqarib boradi. Unga qanotlarda Olimjon Abduvosilov hamda Sanjar SHoyusupovlar yordam berishadi. Zahiradagi hakam Komiljon Rasulov esa bugun yoshlar tarkiblari o'yinida bosh hakam vazifasida ishlaydi. Hasan Ro'ziev bu yilgi mavsum hisobidan “Metallurg” ishtirokidagi birinchi o'yinda ishlasa, jizzaxliklarning Namanganda “Navbahor”ga qarshi safar o'yinida faoliyat yuritgan. O'sha uchrashuvda hisob ochilmagandi – 0:0.


So'g'diyona (Jizzax) – Metallurg (Bekobod)
Hakamlar: H. Ro'ziev (Toshkent), O. Abduvosilov (Toshkent), S. SHoyusupov (Toshkent), K. Rasulov (Qarshi)
Nazoratchi: R. Aytekov (Toshkent).
O'zPFL vakili: V. Letkin.

"Metallurg" matbuot xizmati