Hamid Aktamov: “Rahbariyatning qo'llab-quvvatlashi jamoamizni g'alabaga undaydi”

Davralar oralig'ida o'z tarkibini sezilarli darajada kuchaytira olgan konchilar bu yilgi mavsumda o'z oldilariga sovrinli o'rinlardan birini egallashni maqsad qilishgan. Jamoadagi ichki muhit, o'zgarishlar, kelgusi rejalar hamda navbatdagi uchrashuvga hozirlik  xususida  jamoa bosh menejeri Hamidjon Aktamov “Qizilqum” PFK Matbuot xizmatiga intervyu berdi.

-   Avvalo Muborakdagi g'alaba bilan tabriklaymiz. Ayting-chi, hozirda jamoadagi muhit qanday?
-   Rahmat. Mavsum avvalida o'z oldimizga chiroyli futbol namoyish etib, muxlislarimizni g'alabalarimiz bilan xursand qilishni vazifa qilib qo'ygandik. Birinchi davra yakunlangach, viloyatimiz hokimi hamda bosh xomiymiz - Navoiy kon metallurgiya kombinati (rahbari - Quvondiq Sanoqulov) jamoamizdan katta g'alabalar kutayotganligi, bu borada qo'llaridan kelganicha madad berishlarini alohida takidlab o'tishdi. Ularning qo'llab quvvatlagani natijasida tarkibimizni tajribali futbolchilar bilan boyitdik. Rahbariyatning bu kabi etibori va g'amxo'rligi jamoamizni yangi g'alabalar sari ruhlantirishi va undashi tabiiy, albatta. Jamoadagi ichki muhit esa alo darajada, tarkibda bir-birini anchadan beri yaxshi taniydigan, biladigan o'yinchilarning yig'ilganidan xursandman.

-   Bu yilgi tarkibda barchamiz uchun tanish, tajribali, ammo katta yoshdagi futbolchilar to'p surmoqda.  Navoiyda ularga o'rinbosarlar tayyorlashning ahvoli qanday?
-   Ha, fikringizda jon bor, albatta. Mavsum boshida Samandar SHodmonov, Ilhom Yunusov, Alisher Yusupov kabi futbolchilarni taklif qilgandik. So'ngra, davralar oralig'ida esa Hamza Karimov, Erkin Boydullaev, Nemanya Yovanovich, Vohid SHodiev va Jasur Hasanov kabi nisbatan katta yoshdagi futbolchilar tarkibga qo'shildi. Agar jamoa o'z oldiga jiddiy maqsadni qo'ysa, faqat ishtiyoqning o'zi kamlik qiladi. Bu yo'lda futbolchilar tajribasi va mahorati juda asqotadi. Qolaversa,  tajribali futbolchining jamoaga qo'shilishi yoshlar uchun mahorat maktabi vazifasini o'tab beradi. Misol uchun, Xitoy futbol ligasini oling.  U erda ham bir  qancha yoshi o'tgan yulduzlar to'p surmoqda. Ammo Xitoyning o'zida yosh futbolchilar etishib chiqishi to'xtab qolgani yo'q, futbol rivojlanmoqda. SHu o'rinda etiboringiz uchun aytib o'tmoqchiman, oxirgi paytlarda Navoiyda futbolga etibor kuchaytirildi. Sekin-asta mahalliy futbolchilar ham etishib chiqmoqda. Azizbek Usmonov, Fayzullo Qambarov, Saidjon Hayitov kabi mahalliy futbolchilarning asosiy tarkibda o'z o'rnilarini topib borayotganligi kishini quvontirmay qolmaydi.

-   O'n ettinchi turda Navoiyda ikkinchi davra oldidan ancha kuchaygan Qashqadaryoning yana bir klubini qabul qilasizlar. “SHo'rtan” bilan o'yinda muxlislarni nima kutayapti?
-   Ha, so'zsiz g'uzorliklar ikkinchi davrada emas, birinchi davraning oxiridanoq kuchayishni boshlashgandi. Ular o'z uylarida hatto “Paxtakor”ni ham mag'lubiyatga uchratishdi. Men Qashqadaryo futbolini hurmat qilaman. Jamoamizni oldinda jiddiy raqib kutib turibdi. Birinchi davrada ko'plab qimmatli ochkolarni qo'ldan chiqazdik. Mavsum oxirida har bir ochkoning qadri bilinadi. SHu bois, xoh safar, xoh uyda bo'lsin, faqat g'alaba uchun maydonga tushamiz. Buni klub rahbariyati ham muxlislarimiz ham juda istashmoqda. Qolaversa, sovrinli o'rinlar davogar jamoani boshqa natija aslo qoniqtirmaydi.

 “Qizilqum”  PFK matbuot xizmati.