“Qo'qon-1912”: Yangi futbolchilar tanishtirildi FOTO

Qo'qondagi “Markaziy” o'yingohda bo'lib o'tgan tadbirda “Qo'qon-1912” klubi rahbariyati, murabbiylar shtabi, futbolchilar va bir qator muxlislar ishtrok etishdi.

Marosimni odatdagidek, “Qo'qon-1912” futbol klubi vice-prezidenti, bosh direktori Baxtiyorjon Tolipov ochdi.

– Bu yilgi mavsum jamoamiz uchun og'ir bo'lmoqda, deb so'z boshladi klub rahbari. – Birinchi davrani ko'ngildagidek o'tkaza olmadik. SHuning uchun ikkinchi davra arafasida tarkibning yarmini yangilashga qaror qildik. Klubimizdan 9 nafar futbolchi ketgan bo'lsa, 10 nafar yangi o'yinchini oldik.

Otabek Haydarovning jarohati bor. Safga qaytgach, uning holatiga qarab hujumchi borasida yakuniy xulosaga kelamiz.

O'ylaymanki, mavsum so'nggida o'z oldimizga qo'ygan vazifalarni bajara olamiz. Bunda albatta siz muxlislarning ko'magi ham kerak bo'ladi. “Qo'qon-1912”ning fidoiy muxlislari bisyor ekanligini bilaman. Sizlar jamoamizni yaxshi yomon kunlarida qo'llab-quvvatlab turishingizga ishonaman. Bugun ikkinchi davra arafasida o'z safimizga qo'shib olgan yangi futbolchilarni keng ommaga tanishtiramiz.

SHundan keyin mavsumning ikkinchi qismida jamoamiz sharafini himoya qiladigan yangi o'yinchilarga ikkinchi davrada qaysi raqamlardagi futbol liboslarida o'ynashlarini ommaga taqdim etishdi. Unga ko'ra, Nikita Ribkin 13, SHoxrux Xolmatov 49, Darko Gojkovich 55, Sobir Hamidov 70, Ibrohim Rahimov 75. Nodir Yo'ldoshev 80, Nikola Valentich 83, Suhrob Berdiev 90, Javohir Siddiqov 99, Mirto'ra Akbarov 89 raqamlarda maydonga tushishlari oydinlashdi.

Ikkinchi davrada murabbiylar shtabida ham o'zgarish yuz berdi. Endi darvozabonlarimizga Anvar Jabborov ustozlik qiladi. Marosimda ushbu mutaxassis ham muxlislarga tanishtirildi.

Tadbirda shuningdek, jamoamiz bosh murabbiyi No'mon Hasanov ham so'zga chiqib, qo'qonlik futbol muxlislariga qo'llab-quvvatlab turishgani uchun minnatdorchilik bildirdi va bundan keyin ularning daldalari har qachongidan ham muhim ekanligini takidladi.

Marosimning yakuniy qismida “Markaziy” o'yingoha yig'ilgan futbol muxlislar klub vice-prezidenti Baxtiyorjon Tolipovga o'zlarini qiziqtirgan savollar bilan murojaat etishdi.

Quyida tanishtiruv marosmidan olingan suratlar bilan tanishing: