Miraziz Mirzaahmedov: "O'zbekiston-2 jamoasida o'zini ko'rsatganganlar Osiyo chempionatiga borishi mumkin"

"Yigitlar kecha ham Qirg'iziston bilan o'yin o'tkazishgandi. Baribir charchoq alomatlari sezilib qoldi. Afg'oniston jamoasi menda yaxshi taassurot qoldirdi. Ularda ham futbol ancha rivojlangani ko'rindi.

Jasur Abduraimov nega kelmadi? Kecha ikkita o'yinda ikki jamoani boshqardi. Bugun Tojikiston bilan juda muhim o'yin bor. SHu bois Jasur Birodarovich O'zbekiston-1 jamoasi bilan tonggi mashg'ulotlarni o'tkazishga qaror qildi.

O'yinlar vaqtini men yoki bosh murabbiy belgilamaymiz. Buni tashkilotchilar belgilashadi. To'g'ri issiqda o'ynash qiyin, ammo unutmaslik kerakki Osiyo chempionati Bahraynda bo'ladi. Bu mamlakat esa juda ham issiq iqlimga ega.

Hakamlar haqida nima deyishim mumkin? To'g'risi bugun SHerzod Qosimov boshchiligidagi hakamlar menimcha hech qanday qo'pol xatoga yo'l qo'yishmadi. Afg'oniston murabbiyi hakamlar o'zbekistonlik bo'lgani uchun ularga etiroz bildirdi. Lekin mag'lub bo'lgan jamoa ko'pincha hakamlardan ayb qidiradi. Ishontirib aytamanki bugun boshqa mamlakat hakamlari ishlaganida ham biz yutardik.

O'zbekiston-2 jamoasida o'zini ko'rsatgan 3-4 nafar futbolchi Osiyo chempionatiga borishi mumkin. Barchasi yigitlarning o'ziga va harakatiga bog'liq", - deydi O'zbekiston U-19 yordamchi murabbiyi Miraziz Mirzaahmedov.

Narzulla Saydullaev