Xurshid Olimov: "Yoshlar tarkibida ham raqobat yuqori"
/ Kiritdi: BestMaster O'qilgan: 1158
“Buxoro”-“Obod” uchrashuvi oldidan Yoshlar ligasi doirasidagi o'yindan so'ng (1-0) mezbonlar yarim himoyachi Xurshid Olimovning mazkur o'yin hamda oliy liga doirasidagi bahs haqidagi fikrlari bilan qiziqdik.
- O'yin juda keskin o'tdi. Golim jamoaga g'alaba keltirganidan xursandman. Qolaversa ushbu gol o'zimga nisbatan ishonchimni oshirishda ham muhim ahamiyat kasb etadi. Negaki bizda asosiy tarkib bilan birga o'rinbosarlar jamoasida ham kuchli tarkib yig'ilgan. Bunday sharoitda o'z ustingda tinimsiz ishlab, mahoratingni oshirib bormasang, chetda qolib ketishing mumkin. SHu bois o'rinbosarlar uchrashuvlaridagi har bir bahsda bor imkoniyatimizni ko'rsatishga harakat qilayapmiz. O'z navbatida asosiy tarkib bilan o'tkazilayotgan mashg'ulotlar jarayonida akalarimizdan mahorat sirlarini o'rganishga harakat qilayapmiz.
Ertangi o'yin haqida gapiradigan bo'lsak, “Obod” oliy ligada yaxshi shakllanib kelayotgan jamoalardan biri hisoblanadi. Birinchi davrada ular o'z uyida munosib qarshilik ko'rsatib, durangni saqlab qolishgandi. O'ziga xos revansh olish uchun ham jamoamizda o'yinga jiddiy tayyorgarlik ko'rilmoqda. Nasib etsa, ushbu tayyorgarlik natijasi hisobda ham aksini topib, g'alabaga erishamiz, - deydi X.Olimov.
"Buxoro" matbuot xizmati
Bosh sahifaga
139