Rustam Umarov: “Deyarli Braziliya terma jamoasiga qarshi bahs olib bordik”

Ushbu bahsda tomonlar murosa yo'lini tanlashdi (3:3). SHiddatli kechgan o'yindan so'ng terma jamoamizning asosiy darvozaboni Rustam Umarov Jahon chempionatiga tayyorgarlik to'g'risida fikr bildirdi.

"Ozarboyjon futzal terma jamoasi bilan bo'lgan o'rtoqlik uchrashuvini guvohi bo'ldingiz. Ularda mahalliylashtirilgan braziliyalik futzalchilar jamlangan ekan. Deyarli Braziliya terma jamoasiga qarshi bahs olib bordik. Jahon chempionatidan oldin bunday o'rtoqlik o'yinlari biz uchun juda ham muhim hisoblanadi. Ozarboyjon termasiga qarshi jamoadoshlarim juda ham yaxshi harakat qilishdi. Mag'lubiyatga uchrayotgan paytimizda bor kuchimiz bilan maydonning bir qarich eri uchun ham kurash olib bordik va gollar ura boshladik. Bahsni ko'rgan bo'lsangiz yana o'ynovchi darvozabon bilan gol urishga muvaffaq bo'ldik.

Tayyorgarlik alo darajada o'tmoqda. Bir kunda ikki mahaldan mashg'ulotlar o'tkazyapmiz. Bir hafta oldin jamoadoshlarim jismoniy mashqlarni bajargan bo'lsa biz darvozabonlar  murabbiyimiz Xose Mariya Mendez bilan alohida mashg'ulotlarda qatnashdik. Jahon chempionatida guruh bosqichidagi birinchi o'yinimizni Panama termasiga qarshi o'tkazamiz. Murabbiyimiz Mendez ushbu terma jamoani o'yinlarini ko'rgan ekan. Hozircha mana shu uchrashuvga jiddiy tayyorgarlik ko'ryapmiz. Bu bizning so'nggi o'rtoqlik o'yinimiz emas. Bundan tashqari, biz Eronda Eron terma jamoasi bilan ikkita o'rtoqlik uchrashuvini o'tkazsak, Portugaliya va Ispaniya terma jamoalari bilan ham o'rtoqlik uchrashuvlarida maydonga tushamiz. Aytib o'tganimdek, ushbu terma jamoalarga qarshi o'rtoqlik bahslari biz uchun juda ham muhim. CHunki bu terma jamoalar dunyo reytingida yuqori o'rinlarda turadi. Panamani qanday darajada ekanligini ko'rmaganman, bilmayman ham. Oddiy terma jamoalar Jahon chempionatiga chiqishmaydi.

To'rt yil avval Portugaliya terma jamoasi bilan o'rtoqlik uchrashuvini o'tkazganmiz. O'shanda ham salbiy natijani qayd etmaganmiz. Birinchi bahsda (2:5) hisobida mag'lub bo'lgan bo'lsak, javob uchrashuvida (1:2) hisobida mag'lub bo'lganmiz. Lekin o'sha paytda Rikardino yo'q edi”, - deydi O'zbekiston terma jamoasi posboni Rustam Umarov.