SHavkat Saidov: "Derbi har doimgidek qiziqarli o'tdi"

SHavkat Saidov, “Metallurg” FK jamoa boshlig'i: - Toshkent viloyati jamoalari derbisi har qachongidek bu safar ham qiziqarli va murosasiz kurashlar ostida o'tib, muxlislarga manzur bo'ldi. G'uzordagi mag'lubiyatdan keyin futbolchilarning jismoniy hamda ruhiy holatini tiklash borasida murabbiylarimiz jiddiy bosh qotirishdi. O'yinga tayyorgarlikdan ko'ngil to'lgandi. Biroq uchrashuv boshidayoq gol o'tkazib yuborib, taqibchiga aylanib qolishimizni kutmagandik. Futbolchilarimiz taym o'rtalariga kelganda o'z o'yinlarini namoyish eta boshlashdi. Birinchi taymda biz natijadan qoniqdik. Ikkinchi taymda esa o'yinimizdan.

Bugun o'zining ikkinchi yoshligini boshidan kechirayotgan Zohid Abdullaev yoshlarga o'rnak bo'ldi, deb ayta olaman. Bejizga milliy terma jamoamiz murabbiylari nazariga tushmaganligini isbotladi va juda muhim gollarga mualliflik qildi. Bu o'yinda ochko bizga ham, olmaliqliklarga ham juda zarur edi. Bizga uyimizda devorlarimiz – muxlislarimizning qo'llab quvvatlashi yordam berdi va maqsadimizga erishdik, deydi SHavkat Saidov.

"Metallurg" matbuot xizmati