Hamidjon Aktamov: “Turdan-turga o'yinimizni kuchaytirishga harakat qilamiz”

- “Obod” - oliy liga debyutanti bo'lsa-da, kuchlilarga qanchalik muammolar tug'dirayotganligini barcha ko'rib, bilib turibdi, - deya so'z boshladi Hamidjon G'ulomovich. - Uchrashuvdan avval raqibimiz o'yinlari tasvirga olingan disklarni ko'rib, o'rganishga harakat qilgandik. Bugun g'alaba uchun maydonga chiqqan bo'lsak-da, yakunda hisob yirik ko'rinish olishini tasavvur qilmagandik. Yigitlarga va bizni qo'llab-quvvatlagan muxlislarga katta rahmat! Jamoamiz bugun o'zining chiroyli o'yinlaridan birini ko'rsata oldi. Turdan turga o'yinimizni kuchaytirishga harakat qilamiz.

Erkin Boydullaevning maydondan chetlatilishi ham biz uchun kutilmagan hol bo'ldi. Ketma-ket gollar o'tkazgach, raqibimiz bor etiborini hujumga qaratdi. Xavfni bartaraf etish uchun jamoa sardori o'zini ayamadi va biroz qiziqqonligi evaziga ikki bor sariq kartochka bilan jazolandi. Nima ham derdik, bu ham futbolning bir bo'lagi sanaladi.

Endi jamoa azolariga ikki kunlik tatil beriladi. So'ngra yana qarorgohimizda yig'ilamiz. Xabaringiz bor, milliy terma jamoa yig'ini munosabati bilan 26 avgustda bo'ladigan “Paxtakor” - “Qizilqum” uchrashuvi boshqa muddatga ko'chiriladi. Ammo muxlislarimiz zerikib qolishmaydi. O'FF Terma jamoalar markazi bilan kelishgan holda 26 avgust kuni Navoiyda O'zbekiston Olimpiya terma jamoasi bilan o'rtoqlik o'yini uyushtiramiz. Buni muxlislarimiz mamlakatimiz mustaqilligining yigirma besh yillik to'yiga jamoamizdan sovg'a sifatida qabul qilishlarini so'rardim. So'ngra, Navoiyda bayramdan keyin Jizzaxning “So'g'diyona” jamoasi bilan ham nazorat uchrashuvi o'tkazishni rejalashtirganmiz.

“Qizilqum” PFK Matbuot xizmati.