Ro'ziqul Berdiev: "Jamoamiz bugun o'z xarakterini namoyish qildi"

-Avvalo shuni takidlamoqchimanki, o'yin ajoyib muhitda o'tdi. Buning uchun bugun stadionga tashrif buyurgan muxlislarga ham, jamoamiz o'yinchilariga ham o'z tashakkurimni izhor etaman. Bugun biz xaqli g'alabaga erishdik.

 O'yinni yaxshi boshladik, penaltigacha ikkita qo'lay vaziyatga ega bo'ldik. Ammo penaltidan gol o'tkazib yuborganimiz qaysidir manoda rejamizga ham tasir o'tkazdi. Bugun yigitlarimizda g'alabaga bo'lgan ishtiyoq yuqori edi, ular o'z kuchlariga ishonib harakat qilishdi va g'alabani qo'lga kiritishdi. Keyingi uch o'yinda dastlab gol o'tkazib yuborib, g'alaba qozonayapmiz. Bu jamoamizning xarakteridan va irodasidan darak beradi. Jamoamiz bugun o'z xarakterini namoyish qildi. Jamoamizda hozir raqobat bor, shuning uchun kim o'yinga yaxshiroq tayyor bo'lsa, shu o'yinchiga imkon berayapmiz. Hozir jamoamizda zaxiradan maydonga tushib, o'yinni kuchaytira oladigan o'yinchilarga egamiz. Navbatdagi o'yinni kubok bahslari doirasida “Buxoro” jamoasiga qarshi o'tkazamiz, bugun ular ham, biz ham o'yin o'tkazdik. Kubok bahsi biz uchun juda muhim. “Buxoro”  jamoasiga tayyorgarlik bugundan boshlandi.