Quvondiq Ro'ziev: “Bokschilarimiz vatanimiz shanini munosib himoya qilib bayrog'imizni yuksaklarga ko'tarishmoqda”

Boks yo'nalishida medallar jamg'arish bo'yicha O'zbekiston charm qo'lqop ustalari peshqadamlik qilishmoqda. Bokschilarimizning ko'rsatayotgan natijalarini va chiqishlarini kuzatib borayotgan  “Lokomotiv” klubi futbolchisi Quvondiq Ro'ziev sportchilarimizga minnatdorchilik bildirdi.

“Bokschilarimizning Rio-de-Janeyroda ko'rsatayotgan natijalaridan qoyil qolmasdan ilojimiz yo'q. 10 ta bokschilarimizdan 7 tasi medallarga ega chiqishdi, yana 3 nafar bokschimiz final yo'llanmasini qo'lga kiritdi. Bu yuksak natija. Bokschilarimizga juda ham katta minnatdorchilik aytmoqchiman. Vatanimiz shanini himoya qilib, bayrog'imizni yuksaklarga ko'tarishmoqda. O'zbekiston boksini qanday darajada ekanligini butun dunyoga ko'rsatib qo'yishmoqda. Kerak bo'lsa o'sha nomdor sportchilarni ham mag'lubiyatga uchratishmoqda. Hasanboy Do'stmatov oltin medalni qo'lga kiritdi. Fazliddin G'oyibnazarov final yo'llanmasini qo'lga kiritdi. Men hech bir sportchimizni ajratmoqchi emasman, lekin ko'proq Bektemir Meliqo'zievning jang usuli menga yoqdi. Ochiq jang taklif qilar ekan. SHahram G'iyosovni ham alohida aytib o'taman. SHu bokschimiz avval jahon chempionini keyin esa olimpiya chempionini mag'lubiyatga uchratdi. SHahram G'iyosov finalga charchoq bilan etib kelgani uchun mag'lub bo'ldi deb o'ylayman. Lekin Olimpiadada kumush medal ham katta natija. Final yo'llanmasini qo'lga kiritgan bokschilarimizga va Olimpiadada ishtirok etayotgan barcha sportchilarimizga omad tilayman. Biz ularni har doim qo'llab – quvvatlab turamiz”, - deydi “Lokomotiv” klubi futbolchisi Quvondiq Ro'ziev.

Jahongir Sotvoldiev