16 yoshgacha bo'lgan qizlardan tashkil topgan O'zbekiston terma jamoasi bugun Vetnamga uchib ketadi

2017 yil Xitoyda bo'lib o'tadigan o'smir qizlar o'rtasidagi futbol bo'yicha Osiyo chempionati saralash bosqichida O'zbekiston “D” guruhidan o'rin olgan. Ushbu guruhda O'zbekistonning raqiblari – Avstraliya, Vetnam, Gonkong, Falastin hamda Iroq jamoalari bo'ladi.

Saralashda umumiy, 22 jamoa qatnashmoqda. “A” va “V” guruhlarida 5tadan jamoa bo'lsa, “S” hamda “D” guruhlarida 6tadan jamoa joylashgan. Har bir guruhdan faqat birinchi o'rinni qo'lga kiritgan jamoa final bosqichiga yo'l oladi.

SHimoliy Koreya, Yaponiya, Xitoy hamda Tailand jamoalari 2015 yilda Xitoyda bo'lib o'tgan qita birinchiligida eng yuqori  o'rinlarni qo'lga kiritgani uchun ushbu chempionatda to'g'ridan to'g'ri final bosqichida ishtirok etadi. SHu tariqa, Xitoyda bo'ladigan o'smir qizlar o'rtasidagi futbol bo'yicha Osiyo chempionatida 8 jamoa qatnashadi.

Tailand to'g'ridan-to'g'ri yo'llanmaga ega bo'lishiga qaramay, final bosqichiga tayyorgarlik ko'rish maqsadida saralash bosqichida ishtirok etishga qaror qilgan. Agar Tailand o'zi ishtirok etayotgan “A” guruhida birinchi o'rinni egallasa, u holda guruhda ikkinchi o'rinni qo'lga kiritgan jamoa final bosqichiga yo'l oladi.

O'smir qizlar o'rtasidagi Osiyo chempionati final bosqichi o'tkazilish sanalari hali malum qilinmagan.