Sanjar Rashidov: Akamga munosib uka bo'lishga intilyapman

Akasiga havas qilib futbolni tanlagan Sanjar qisqa fursatda o'sishga erishdi. O'tgan turda uning Navbahor darvozasiga urgan chiroyli goli futbol muxlislari va mutaxassislari orasida etarlicha muhokamaga sabab bo'ldi. Yana bir istedodning yuzaga chiqayotgani esa barchamizni quvontiradi. Biz Lokomotivga qarshi kechgan uchrashuv oldidan Sanjar Rashidovdan intervyu oldik.

- Sanjar, futboldagi ilk qadamlaringiz qanday bo'lgan?

- Albatta, bu xohish oilaviy muhit tasirida vujudga kelgan. Akamga havas qilib, sportning shu turini tanladim. Qiziqishimni payqagan otam So'g'diyona futbol maktabiga olib bordilar va shu tariqa millionlar o'yinidan saboq ola boshladim. Ilk murabbiyim Usmon Muxametshin bo'lganlar.

- Akangiz Sardor bunga qanday munosabat bildirgan?

- Ijobiy qaraganlar. Ko'pincha o'zlari bilan mashg'ulotlarga olib ketardilar. Futbol o'ynashni boshlaganimdan keyin esa turli tavsiyalari bilan o'rtoqlashardilar. Hozirgacha o'z maslahatlarini ayamaydilar.

- Qaysi chiziqda o'ynay boshlagansiz?

- Yoshligimdan faqat yarim himoya markazida o'ynashni xush ko'rganman. Boshqa poziciyada harakat qilmaganman.

- So'g'diyona bilan qachon professional shartnoma tuzgansiz?

- Bu quvonchli kunni esdan chiqarib bo'lmaydi. 2011 yilda ilk professional bitimga imzo chekkanman. O'shandan beri viloyatimiz bosh jamoasi sharafini himoya qilib kel-yapman.

- Amaldagi shartnomangiz qachon yakunlanadi?

- SHu yil oxirida.

- Balki kelasi yili sizni o'z oldiga jiddiy vazifalarni qo'yadigan jamoa tarkibida ko'rarmiz?

- Nasib qilsa, shunday bo'ladi.

- Sardor Rashidovning ukasi bo'lganingiz sizga foydami yoki ayrim holatlarda zararga ham ishlashi mumkinmi?

- Baribir, menda masuliyat ko'proq bo'ladi. O'yinlarda bosim o'z so'zini aytadi.

- Bundan qanday chiqib ketishga harakat qilyapsiz?

- Faqat o'z o'yinim bilan. Sardor Rashidovning ukasi bo'lganim bilan, u mening o'rnimga maydonga tushib, o'ynab bermaydi-ku! O'z ustimda ko'proq ishlab, ortiqcha gap-so'z va etirozlarga o'rin qoldirmaslikka harakat qilyapman.

- Sardor Rashidovning ukasi, deyishlariga qanday qaraysiz?

- Ijobiy qarayman. Munosib uka bo'lishga intilaman.

- So'g'diyona jamoasining bu yilgi ishtirokini o'rtacha baholash mumkinmi?

- Hozirgi ko'rsatkichlarimiz yomon emas. Hali oldinda etarlicha o'yinlar bor. Mazkur uchrashuvlarda natijani yanada yaxshilashga harakat qilamiz. Bundan ham yaxshi bo'lishi mumkin edi. Afsuski, ayrim bahslarda qimmatli ochkolarni yo'qotdik.

- Aynan qaysi o'yinlarda?

- Andijon, Obod klublariga qarshi kechgan uchrashuvlarda muhim ochkolarni boy berdik. Kutilmaganda o'z maydonimizda Buxoro va Qizilqum jamoalari bilan durang o'ynadik.

- Joriy mavsumda So'g'diyona jamoasi oldiga aniq vazifa qo'-yilganmi?

- Imkon qadar yuqoriroq o'rinlarni egallashimiz kerak.

- Jizzaxda ajoyib stadion bor. Muxlislar ham futbolni yaxshi ko'rishadi. Ularga nima degan bo'lardingiz?

- Birinchi navbatda, har bir o'yinda stadionga kelib, qo'llab-quvvatlab turishgani uchun minnatdorchilik bildiraman. Bundan aslo charchashmasin. SHunga yarasha biz ham mazmunli futbol namoyish etishga harakat qilamiz.

- Endi navbat - blic-savollarga. Sevimli futbolchingiz?

- Xavi.

- Nima uchun?

- O'zining zargarona to'p uzatishlari bilan qolgan futbolchilardan ajralib turadi. Texnikasi juda kuchli. Undan o'rganadigan jihatlar ko'p.

- Sevimli klubingiz?

- SHubhasiz, Barselona. Menga bu jamoaning o'yin uslubi yoqadi.

- Faoliyatingizdagi eng chiroyli golingiz?

- O'tgan turda Navbahor jamoasi darvozasiga urgan golim.

- Faoliyatingizdagi eng esda qolgan va aksincha, eng alamli uchrashuv qaysi?

- Ikkalasi ham bitta o'yinda bo'lgan. Birinchi davrada Lokomotiv klubini qabul qilib, durang (1:1) o'ynaganmiz. Kuchli raqibdan ochko tortib olganimiz ijobiy, g'alabani qo'ldan chiqarganimiz esa alamli holat bo'lgan.

- Taxmin qilib ko'ring, bu yil qaysi jamoa O'zbekiston chempioni bo'ladi?

- Bunyodkor.

- Qaldirg'ochlar Lokomotiv bilan o'rtadagi 5 ochkolik farqni yo'qqa chiqara olishadimi?

- Buni uddalasa bo'ladi. Oldinda o'yinlar ko'p. Peshqadamning ochko yo'qotmasligiga hech kim kafolat bermaydi. Ikkinchi davrada kutilmagan natijalarga boy o'yinlar etarlicha bo'ladi.


Kamoliddin ALIMOV suhbatlashdi