Jurjevich Tojikistonga jo'nab ketdi

Jahon chempionati 3-saralash bosqichi 1-turi doirasida Toshkentda O'zbekiston terma jamoasiga qarshi maydonga tushadigan Suriya terma jamoasi mazkur o'yinga tayyorgarlik jarayonida 27 avgust kuni safarda Tojikistonga qarshi o'rtoqlik uchrashuvini o'tkazadi.

Takidlash joiz, saralash bosqichidagi raqiblarning o'yinlari Samvel Babayan bosh murabbiyligidagi terma jamoa murabbiylari shtabida katta qiziqish uyg'otgan. SHu bois, milliy terma jamoa texnik direktori Deyan Jurjevich 1 sentyabr kuni Toshkentda mehmon bo'ladigan Suriya terma jamoasining o'yinini kuzatish va o'rganish uchun Tojikistonning Xo'jand shahriga jo'nab ketdi.

Eslatib o'tamiz, Suriya terma jamoasi Jahon chempionati 3-saralash bosqichi ilk turi doirasida 1 sentyabr kuni Toshkentda O'zbekiston milliy terma jamoasiga qarshi maydonga tushadi. Mazkur o'yin Toshkentdagi “Bunyodkor” stadionida bo'lib o'tadi.