O'zbekiston U16 o'smir qizlari Osiyo chempionati saralashidagi ishtirokini yakunladi

16 yoshgacha bo'lgan qizlardan tashkil topgan O'zbekiston terma jamoasi saralash bahslarini “D” guruhida olib bordi.

Ushbu saralash guruhi o'yinlariga Vetnam mezbonlik qildi. Saralash turnirining ilk uchrashuvida aynan mezbon terma jamoaga qarshi o'yin o'tkazgan o'zbekistonlik qizlar 1:2 hisobida mag'lub bo'ldi.

Ikkinchi uchrashuvda Falastin bilan 1:1 hisobida durang o'ynagan O'zbekiston saralash turnirining uchinchi o'yinida Gonkongni 2:0, to'rtinchi o'yinda Iroqni 4:0 hisoblarida mag'lub etdi.

Uchinchi sentyabr kuni bo'lib o'tgan so'nggi tur uchrashuvida O'zbekistonning raqibi ushbu saralash guruhining yaqqol favoriti – Avstraliya o'smir qizlar terma jamoasi bo'ldi. Barcha raqiblarini faqat yirik hisoblar bilan mag'lub etib kelayotgan avstraliyaliklar, O'zbekiston darvozasiga ham 9 bora yo'l topishdi. Bu gollarga O'zbekiston faqat bir bora, Marjona To'raevaning goli bilan javob bera oldi– 1:9.

Takidlash kerakki, dastlabki turda Falastinni 28:0 hisobida mag'lub etgan Avstraliya, yakunda 5 o'yinda 65 marta raqiblar darvozasini ishg'ol qilib, faqatgina O'zbekiston bilan uchrashuvda bir gol o'tkazib yubordi.

SHu tariqa ular guruhda birinchi o'rinni egallab, Xitoydagi final bosqichiga yo'l oldi. O'zbekiston esa guruhda 3-o'rinni qo'lga kiritib, ishtirokini shu bosqichda yakunladi.