Vitaliy Denisov bugungi mashg'ulotlarda ham qatnasha olmadi

Kecha Aziz Haydarovni safdan chiqqanligi va Vitaliy Denisovni mashg'ulotda ishtirok etmagani haqida yozib o'tgan edik. Afsuski "Lokomotiv" himoyachisi bugun ham mashg'ulotlarda qatnasha olmadi. Hozircha uni Qatarga borishidan boshqa hech nima malum emas.

Bugungi mashg'ulotlar soat 19:20da boshlandi. Odatga ko'ra chigal yozdi mashg'ulotlar o'tkazilgach, murabbiylar taktik mashqlarga navbatni berishdi. Deyan Jurjevich Xitoy safariga hozirlik ko'rayapti. O'zbekiston - Suriya o'yiniga Xitoy va Qatardan "ayg'oqchilar" kelgani aytib o'tishimiz lozim. Huddi biz kabi, raqiblarimiz ham terma jamoamizni zimdan o'rganyaptilar.

Soat 20:00ga qadar davom etgan mashg'ulotning so'nggi daqiqalari burchak zarbasini to'g'ri amalga oshirishga qaratildi. Bugungi kunda terma jamoamizning eng og'riqli nuqtalaridan biri aynan shu bo'lib turibdi. Suriya bilan o'yinda O'zbekiston terma jamoasi, bir emas 17 (!!!)ta burchak zarbasini bajardilar. Ulardan faqat birginasi xavfli ko'rinish olgandi (yodingizda bo'lsa Geynrixning to'p uzatishidan so'ng Ahmedov to'xtatmay uni darvoza tomon yo'naltirgandi).

Ertaga terma jamoamiz charter reys bilan Qatar poytaxtiga uchib ketadilar. U erdagi o'yin mahalliy vaqt bilan soat 19:00da "Al Sadd" stadionida boshlanadi.

Bugun Vitaliy Jalilovning tug'ilgan kuni munosabati bilan uni tabriklashdi.

Nodirxo'ja Yuldashev.