Bugun futbol. "Lokomotiv" - "SHo'rtan"

Oliy liga, 21-tur. 9 sentyabr
LOKOMOTIV - SHO'RTAN
Bosh hakam: Olim Tolibjonov

Turnir jadvalidagi o'rni: "Lokomotiv" 1-o'rinda (49 ochko), "SHo'rtan" 11-o'rinda (20 ochko).
Ochkolar orasidagi farq - 29 ochko.

Tarif: Aslida "SHo'rtan" hozirgacha 23 ochko to'plagandi, biroq PFL qaroriga ko'ra klubdan 3 ochko olib tashlangan. Bugun ikkala jamoa ishtirokida  chiroyli futbol kechishi kutilmoqda. Albatta, o'yinda "Loko" favorit, ammo "SHo'rtan" ham anoyilardan emas. Bu jamoa o'tgan tur 1:2 hisobida mag'lubiyatga uchrayotib, yakunda 3:2 hisobida zafar quchganini unutmaslik lozim.

Fakt: Birinchi davrada G'uzorda kechgan bahsda "temiryo'lchilar" 2:0 hisobida zafar quchishgandi. "Loko" safida Timur Kapadze bilan Server Jeparov gol muallifi bo'lishgan.  

Fakt: "Lokomotiv" oliy ligada o'z maydonida 10ta uchrashuv o'tkazib, shundan 9tasida g'alaba qozongan va bir marta durang o'ynagan. To'plar nisbati 29-4. "SHo'rtan" esa safar bahslarida 10ta uchrashuvda maydonga tushib, ikki bor zafar quchgan. Bir marta durang o'ynab, 7 marta mag'lub bo'lgan. To'plar nisbati 16-23.

Fakt: "Lokomotiv" ikkinchi davrada to'rtta uchrashuv o'tkazib, uchtasini g'alaba bilan yakunladi. "SHo'rtan" esa beshta o'yindan ikkitasida zafar quchdi va uch bor mag'lubiyatga uchradi.

Eslatma: "Do'stlik" stadionida kecha o'tkazilgan Yoshlar ligasi bahsida kuchlar teng keldi. "Lokomotiv" - "SHo'rtan" 2:2.