Hayot davom etadi, "Lokomotiv" bor etiborini keyingi o'yinlarga qaratadi

Safarda bu jamoa bilan 0:0 hisobini qayd etib qaytgan "Loko" Toshkentda kechgan bahsda 0:1 hisobida yutqazib qo'ydi.

Albatta, ushbu natijadan so'ng ko'pchilikning ko'ngli xira bo'lgani bor gap, ammo nima ham derdik, bu - futbol va bunda g'alabalar qatori mag'lubiyat ham bo'lib turadi. Eng muhimi shuki, "Lokomotiv" boshini tik ko'targan holda musobaqa bilan xayrlashdi.

"Loko" o'zi ishtirok etgan barcha o'yinlarda xarakter ko'rsata oldi. Buning uchun futbolchilar va murabbiylar shtabiga rahmat aytsak arziydi. Lekin kechagi bellashuvda yo'l qo'yilgan bazi bir xatolar tufayli jamoa mag'lub bo'ldi.

SHunga qaramay, klub o'z tarixida yangi sahifa ochdi. "Lokomotiv" o'z tarixida birinchi bor Osiyo chempionlar ligasida guruhdan chiqdi, hatto chorak finalga qadar etib keldi. Bunaqasi klub tarixida birinchi bor ro'y berdi. Qolaversa, bu yilgi OCHLda eng uzoq mag'lubiyatsiz seriyani davom ettirgan jamoa ham aynan "Lokomotiv" bo'ldi.

"Temiryo'lchilar" musobaqada 10ta o'yin o'tkazib, shundan 9tasida mag'lub bo'lishmadi (uchta g'alaba, oltita durang). Ammo birgina mag'lubiyat "Lokomotiv"ni musobaqani tark etishiga olib keldi. "Lokomotiv" bu yil OCHL guruhidan chiqqan yagona o'zbek klubi bo'ldi va bu ham Osiyo etiboriga tushdi. Mana shu natija tufayli barchaga rahmat aytsak arziydi.

Hayot esa davom etadi va klubimiz bor etiborini navbatdagi o'yinlarga qaratadi. Hali oldinda "lokochilar"ni milliy chempionat va O'zbekiston Kubogi bahslari kutmoqda. Bo'lajak bellashuvlarda jamoamizga omad yor bo'lishini tilab qolamiz. "Lokomotiv" o'zining keyingi uchrashuvini oliy liga doirasida 17 sentyabr kuni safarda "Olmaliq"qa qarshi o'tkazadi.