Bugun futbol. "Olmaliq" - "Lokomotiv"

Oliy liga, 22-tur. 17 sentyabr
OLMALIQ - LOKOMOTIV
Bosh hakam: Baxtiyor Namozov

Turnir jadvalidagi o'rni: "Olmaliq" 11-o'rinda (22 ochko), "Lokomotiv" 1-o'rinda (52 ochko).
Ochkolar orasidagi farq - 30 ochko.

Tarif: CHempionlik uchun harakat qilayotgan "Lokomotiv" bu turda "Olmaliq" mehmoni bo'ladi. Bugun Olmaliq shahrida qiziqarli bahs kechishi kutilyapti. Boisi ikkala jamoa ham hujumkor futbolni xush ko'radi. "Olmaliq"ning ikkinchi davrada hali g'alaba qozonmaganini inobatga olsak, Igor SHkvirin shogirdlari astoydil kurash olib borishsa kerak. Ammo "Loko" ham qarab turmaydi, negaki jamoa oldiga chempion bo'lish vazifasi qo'yilgan va buning uchun har bir o'yin muhim sanaladi.

Fakt: O'z maydonida 9ta uchrashuv o'tkazgan "Olmaliq" shundan oltitasida g'alaba qozonib, uch marta mag'lub bo'lgan. To'plar nisbati 17-11. "Lokomotiv" esa safarda 9 bor maydonga oushib, oltita g'alabaga erishgan va uch marta durang o'ynagan. "Lokomotiv" safarda mag'lub bo'lmagan yagona jamoa bo'lib turibdi. To'plar nisbati 20-10.

Fakt: "Olmaliq" ikkinchi davrani ketma-ket to'rtta mag'lubiyat bilan boshladi va o'tgan turda durang o'ynadi. Jamoa ikkinchi davrada beshta o'yin o'tkazib, faqat bir ochko jamg'ardi. "Lokomotiv" esa beshta uchrashuvdan to'rttasini g'alaba bilan yakunlab, bir bor durang qayd etdi.

Eslatma: Toshkentda bo'lib o'tgan birinchi davra uchrashuvida "Lokomotiv" yirik 4:0 hisobida zafar quchgan. Ikki marta Marat Bikmaev to'p kiritgan bo'lsa, Ikrom Aliboev bilan Server Jeparov hisobiga bittadan gol yozilgan.