Oliymi yoki o'xshamagan liga?

So'nggi marotaba chempionatimiz 2008/10 yillarda qizigan bo'lsa kerak. Bunday qing'ir ishlar doimo bo'lib kelgan. Lekin hech qachon biron kishi jazolanmagan edi. Eng yomoni mazkur holatdan terma jamoamiz jabr chekyapti. Allaqachon chiqishimiz kerak bo'lgan jahon chempionati biz uchun armon bo'lib qolyapti. Bunga barcha aybdor. OAV endi gapiraman desa uni turtkilashadi, futboldan ularga qo'shib muxlislarni ham sovutib bo'lishdi.

Kecha Rustam Mirsodiqovni lecenziyasi mavsum so'nggiga qadar olib qo'yilganligi haqida xabar chiqdi. Nima uchun faqat Rustam Mirsodiqov, qolgalarchi? Qolganlar oppoqmi? Albatta yo'q. Aslida islohatni PFLni o'zidan boshlash kerak. Ayrim klublarga yon bosish, yoqmaganini sarson-sargardon qilish bu tashkilot uchun odat tusiga aylandi. Ayniqsa musobaqalar o'tkazish bo'limini tubdan yangilash kerak. Allaqachon zerikarli chempionatlar reytinigda "Top-3"ga kirib olgan oliy ligamizni qizitib berish, undagi raqobatni oshirish aslida ularning qo'llarida. Mavsumiy "zayavkalar" hamon eskicha, haftlab qog'oz tashish bilan o'tadi. Butun dunyo elektron tizimga o'tganiga yillar bo'lib ketdi. Lekin har doim ham aybdor hakamlar bo'lavermas ekan. Ularga bu yil ish avvalgilardek ko'p bo'lmadi. Barchasini boshida klublarni o'zlari ekan.

Bu masalaga faqatgina bir kishini chetlatish bilan echim berib bo'lmaydi. Islohat boshlandimi, hammani tekshirsinlar. Hech kim qolmasin. Yoshlarga qachon yo'l ochiladi? Bir ishni eplay olmagan kishi, nahot vatan ravnaqi yo'lida o'z o'rnini bo'shata olmasa.

Birinchi liga-ku, allaqachon "totalizator" to'riga tushib bo'lgan. Buni oliy ligadagi bazi o'yinlarda ham ko'ryapmiz. Besh tur davom etgan halol futbol ikkinchi davradan keyin batamom o'zgardi. To'g'risi birinchi davraning so'nngi turlarigacha bilmadik. Isbot yo'q degan gapni esa shunchalik yodlab oldikki, sher qilib aytib yursak bo'ladi. Rahbarlar, murabbiylar stadionlarga bir qarang! Zerikkanidan futbolga kelayotganlar evazigagina ayrim stadionlarda muxlis bor.

Markazda ham, PFLda ham rahbarlarni o'zgartiradigan vaqt keldi. Hozir ayni payti. Yangilikka va g'oyalarga boy mutaxassislarni Respublika bo'ylab saralanib oladigan ayni payti. Hammani qo'li bor joyda, bir kishini chetlatish bilan ish bitmaydi. Qars ikki qo'ldan chiqadi. Hamma aybdor, lekin muxlislardan iltimos qilardik, OAVni ayblamang. Bugungi OAVga haykal qo'ysa arziydi teatrni futbol deya yorita olayotganiga!

Ertangi yil uchun dasturi bo'lmagan tashkilot hech qachon muvaffaqiyatga erishmaydi!

Xayf oliy liga klublariga ajratilayotgan shuncha pullar. Ularga jazo tariqasida keyingi yil byudjetlarini ikki yoki uch barobarga kamaytirib yuborish kerak.

Bitta futbolchidan so'rangchi, "oliy ligada to'p tepib rohat olyapsanmi", deb. Yo'q, ular uchun futbol hammamizning ishimiz bo'lgani kabi, ikki soatga borib kelinadigan ishdan boshqa narsa bo'lmay qoldi. Zerikarli chempionat, zerikarli mavzular, zerikkan muxlis-u, futbolchilar. Hamma - hammasi zerikarli. Agar 2 yil o'tib "xayr Rossiya, salom Qatar!", deydigan bo'lsak, bilingki ularning barchasiga bugungi kunimiz sabab.

Yaqinda "Bunyodkor" muxlisining bir gapidan o'zim uyalib ketdim. "So'rab ko'ring, agar PFLdagilar Jizzaxga kubokni ko'tarish uchun podiumni olib borishmasa, o'z hisobimdan katta mashina gaplashaman. "Bunyodkor" yutadimi yoki "Nasaf", farqi yo'q"...

Nodirxo'ja Yuldashev