Bruno Garsiya: “O'zbekiston Panamani mag'lub etganda keyingi bosqichga chiqardi”

Ushbu musobaqada Vetnam terma jamoasi to'rtinchi o'rinni egallab Kolumbiyada bo'lib o'tayotgan mundialga yo'llanmani qo'lga kiritgandi. Ayni damda Vetnam terma jamoasi o'z guruhida uchinchi o'rinni egalladi. Barcha guruhda eng yaxshi uchinchi o'rinni egallagan terma jamoalar “pley-off” bosqichiga yo'llanmani qo'lga kiritadi. Vetnam mana shu yo'llanmadan birini qo'lga kiritdi va keyingi bosqichda Rossiya terma jamoasi bilan bellashadi. Ushbu uchrashuvdan oldin Vetnam terma jamoasi bosh murabbiyi Bruno Garsiya ijtimoiy tarmoq orqali O'zbekiston hamda Vetnam terma jamoalari ishtiroki haqida o'z fikrlarini bildirdi.

“Avvalam bor O'zbekiston terma jamoasi haqida gapiradigan bo'lsam, ilk uchrashuvda Panama terma jamoasini mag'lub etishlari kerak edi. Ushbu o'yin terma jamoangiz uchun muhim uchrashuv edi. Ochig'ini aytsam, o'sha uchrashuvda O'zbekiston milliy terma jamoasi nima sababdan mag'lub bo'lganini bilmayman. Lekin, Kolumbiya terma jamoasiga qarshi juda ham kuchli o'yin ko'rsatishdi va 1 ochkoni qo'lga kiritishdi. Agarda O'zbekiston terma jamoasi Panamani mag'lubiyatga uchratganda “pley-off” bosqichiga chiqqan bo'lar edi. O'z guruhimizdagi uchrashuvlar haqida gapiradigan bo'lsam, guruhdagi eng qiyin o'yinimiz Italiya terma jamoasiga qarshi kechdi. Italiya bizdan kuchli edi. Afsuski ushbu o'yinda biz mag'lub bo'ldik.  Biz eng yaxshi uchinchi o'rinni egallagan to'rt jamoadan biri bo'lib keyingi bosqich yo'llanmasini qo'lga kiritdik. “pley-off” bosqichida Rossiya terma jamoasiga qarshi bahs olib boramiz”, - deydi Vetnam terma jamoasi bosh murabbiyi Bruno Garsiya.

Jahongir Sotvoldiev