Hamidjon Aktamov: “Bugun yigitlarimiz iroda namoyish qilishdi”

-Bugun jiddiy raqibga qarshi jamoamiz chiroyli o'yin namoyish etib, xarakter ko'rsata oldi, - deya so'z boshladi Hamidjon G'ulomovich. - Avvaliga hisobda ortda qolayotib, o'rtadagi muvozanatni tikladik. Hatto hisobda oldinga chiqa oldik. “Nasaf”da tajribali mutaxassis ishlayapti. Tarkibi ham anchagina shakllangan jamoa. CHempionat va O'zbekiston kubogida ularning qanday o'yinlar namoyish etayotganligini barcha ko'rib, bilib turibdi. SHunga qaramay, bugun yigitlarimiz har jabhada ulardan ustunlikka erishishga urindi. Menimcha, jamoamiz ko'rsatgan o'yin muxlislarimizga ham maqul bo'ldi. Afsuski, uchrashuv tugashiga sanoqli daqiqalar qolganida g'alabani qo'ldan chiqarish juda alam qildi. O'yinda g'alaba qozonishimiz ham mumkin edi. Biroq oxirgi daqiqalarda himoyada yo'l qo'yilgan birgina xato bizga qimmatga tushdi.  Garchi, hisobdan qoniqmagan bo'lsam-da, yigitlarimizning xatti-harakatlaridan ko'nglim to'ldi.

Muhimi, so'nggi turlardagi muvaffaqiyatsizlikdan keyin jamoamiz ruhiy tushkunlikdan chiqib, o'z irodasini namoyish etdi. Bu oldimizda turgan safardagi ikki o'yin oldidan juda katta ahamiyatga ega edi.

O'z navbatida bizni qo'llab quvvatlayotgan viloyat hokimligi, xomiylarimiz, ayniqsa, ko'psonli muxlislarimizga katta rahmat! Ularning jamoamizga bo'lgan ishonchi yigitlarimizni hujumkor va chiroyli futbol o'ynashga ruhlantirmoqda. Maqsadimiz o'zgarmaydi. Mavsumning qolgan uchrashuvlarida ham maksimal darajada ijobiy natijani qo'lga kiritish uchun kurashni davom ettiramiz.

“Qizilqum” PFK Matbuot xizmati.