Oliy liga. 23-tur ramziy terma jamoasi

Odatga ko'ra, yakunlangan tur ramziy terma jamoasini tuzib chiqdik.

Darvozabon
Eldor Tojiboev "SHo'rtan"

Ramziyimizning darvozasiga G'uzorning "SHo'rtan" jamoasi posboni Eldor Tojiboevni qo'ydik. Jizzahda quruq o'yin o'tkazgan Eldor bunga munosib.




Himoyachilar
Jamol Otaqulov "SHo'rtan"
Sardor Rahmonov "Neftchi"
Xurshid G'iyosov "Obod"

"SHo'rtan" himoyachisi Jamol Otaqulov "So'g'diyona" bilan safarda nolga o'ynashdan tashqari, bahsning 50-daqiqasida hisobni ham ochdi.

Farg'onaning "Neftchi" klubi himoyachisi Sardor Rahmonov 57-daqiqada penaltidan kiritgan gol evaziga "Olmaliq" ustidan qozonilgan g'alabaga o'z hissasini qo'shdi.

23-turning sensaciyasi Toshkent derbisida qayd etildi. CHempionat peshqadami "Lokomotiv" kutilmaganda o'z maydonida debyutant "Obod"ni enga olmadi. 1:1 hisobida yakuniga etgan uchrashuvda "Obod" himoyachisi Xurshid G'iyosovning ham ulushi katta bo'ldi.

Yarim himoyachilar
Javohir Sohibov "Paxtakor"
SHoxruh Gadoev "Bunyodkor"
Mirzakamol Kamolov "Mashal"
Jaloliddin Masharipov "Paxtakor"

Amaldagi chempion "Paxtakor" asta-sekin o'ziga kela boshladi. "SHerlar" bu turda Namanganda yirik g'alabani qo'lga kiritishdi. Uchrashuvda "Paxtakor" tayanch yarim himoyachisi Javohir Sohibov professional faoliyatidagi birinchi dublni qayd etdi.

"Bunyodkor" azosi SHoxruh Gadoev "Qo'qon-1912"ga qarshi asosiy tarkibda maydonga tushdi va murabbiy ishonchini o'z goli bilan oqladi.

Muborakning "Mashal" jamoasi bu turda "Andijon" taslim etdi. Uchrashuvda muborakliklar yarim himoyachisi Mirzakamol Kamolov o'zining faol harakatlari bilan ajralib turdi va bitta golga hammualliflik qildi.

Tobora o'zini o'nglab borayotgan "Paxtakor"ning "Navbahor" ustidan qozongan g'alabasida Jaloliddin Masharipovning ham hissasi katta bo'ldi. Jalol bitta golli pas berdi va eng faol futbolchilardan biriga aylandi



Hujumchilar
SHohruz Norxonov "Obod"
Kenja To'raev "Mashal"
SHerzod Hakimov "Neftchi"

"Lokomotiv"ga qarshi o'yinda zaxiradan maydonga tushgan "Obod" hujumchisi SHoxruz Norxonov o'yinni o'zgartirib yubordi. 78-daqiqada Norxonov to'p uchun havodagi kurashda bo'ydor Nemanya Yanichichni engib himoyachidan qochib ketdi va Nesterov qo'riqlayotgan darvozani ishg'ol qildi.

"Mashal" hujumchisi Kenja To'raev professional faoliyati davomida hali dubl ham qilmagan edi. "Andijon"ga qarshi bahsda esa xet-trik qayd etdi.

Ramziy terma jamoamizning uchinchi hujumchisi "Neftchi" vakili SHerzod Hakimov. Hakimov "Olmaliq" klubiga qarshi o'yinning dastlabki daqiqalaridayoq ikkita to'p kiritib jamoasiga ishonch bag'ishladi. Bu esa uni ramziyga kiritishimiz uchun etarli omil.