Aleksandr Lobanov: “Paxtakor” oldin ham bo'lgan, bundan keyin ham bo'ladi”

Turning markaziy o'yinida muxlislar Toshkent derbisiga guvoh bo'lishdi. Unda “Paxtakor” hamda “Lokomotiv” jamoalari kuch sinashishdi. Ushbu bahsda “sherlar”ning qo'li baland keldi (2:1). Uchrashuvdan so'ng “Paxtakor” klubi darvozaboni Aleksandr Lobanov o'z fikrlarini bildirdi.

“Derbi uchrashuvlari har doim qiyin bo'ladi. “Paxtakor” hamda “Lokomotiv” qaysi pog'onada bo'lishidan qatiy nazar, bunday o'yinlarda haqiqiy jang bo'ladi. Bu kabi bahslarda kurashish uchun maydonga chiqish kerak. Qanday holatda bo'lmasin, “Paxtakor” oldin bo'lgan, bundan keyin ham bo'ladi. Biz juda yaxshi harakat qildik. Keyingi uchrashuvlarda “Paxtakor” umuman boshqacha o'yin ko'rsatishi mumkin. Biz avvalgi holatimizni tiklab oldik, bundan xursandman. Ketma-ket 4 ta o'yinda g'alaba qozonib kelyapmiz. Musobaqa jadvalida biroz bo'lsada yuqorilab oldik. Afsuski, ushbu uchrashuvdan so'ng biroz muddat tanaffusga chiqamiz.

Endi safarda “Neftchi” jamoasi mehmoni bo'lamiz. Ushbu bahsga ham jiddiy tayyorgarlik ko'rishimiz kerak. Iloji boricha kuchli to'rtlikka kirib olishimiz zarur. Biz “Lokomotiv” klubini mag'lub etishni xohlagan edik. Yakunda shunday ham bo'ldi. Mavsum boshida biroz oqsaganimiz sababli hozir har bir ochko uchun kurash olib boryapmiz. Agar ushbu uchrashuvda 0:0 yoki 1:1 hisobi bo'lib turganida, men so'nggi daqiqalarda jamoadoshlarimga yordam berish maqsadida hujum chizig'iga etib borardim va g'alaba qozonishimiz uchun qo'limdan kelgan barcha ishni amalga oshirardim. Biz uchun eng muhimi g'alaba edi, yaxshi hamki buni amalga oshirdik. Raqibimiz juda ham kuchli edi. Bilmadim, ularga nimadir etishmayapti deb o'ylayman. O'ylashimcha, ular bu yil chempion bo'lishi mumkin. Biz o'z vazifamizni bajarmoqdamiz, “Lokomotiv” ham o'z vazifasini bajarmoqda. Menimcha, “Lokomotiv”ga g'alabaga bo'lgan xohish etishmadi. To'g'ri, hakam menga sariq kartochka ko'rsatdi. Lekin, men o'yin vaqtini cho'zish niyatida emas edim”, - deydi “Paxtakor” klubi posboni Aleksandr Lobanov.

Jahongir Sotvoldiev