O'zbekiston U-19 terma jamoasi O'FF rahbariyati bilan uchrashdi

Bugun O'zbekiston Futbol Federaciyasi anjumanlar zalida O'zbekiston yoshlar terma jamoasi hamda O'FF rahbariyati ishtirokida yig'ilish bo'lib o'tdi. Yig'ilishda, Bahraynda start oladigan yoshlar o'rtasidagi Osiyo chempionatiga jo'nab ketayotgan terma jamoa murabbiylari va futbolchilari so'z olib, terma jamoa turnirga tayyor ekanini takidlashdi.

O'zbekiston yoshlar terma jamoasi bosh murabbiyi Jasur Abduraimov terma jamoa Osiyo chempionatiga yaxshi tayyorgarlanganini va turnirda jamoa yaxshi natija ko'rsatishidan umidvor ekanini aytdi: “So'nggi vaqtda biz terma jamoani etarli darajada shakllantira oldik. Ko'plab yig'inlar va turnirlarda ishtirok etdik va bu vaqt oralig'ida kerakli tajriba to'pladik. Bizning safimizdagi ko'plab futbolchilar Oliy Ligada o'rinbosarlar safida to'p surayotgan edilar. Bugunga kelib, ularning ko'pi asosiy tarkibda ham maydonga tushmoqdalar. Biz yig'inlarda yangi g'oya va taktikalarni sinab ko'rdik. Osiyo chempionatiga yaxshi niyat va maqsad bilan yo'l olmoqdamiz. Agar futbolchilar o'zlariga yuklatilgan vazifani to'liq bajara olsalar va o'z o'yinlarini ko'rsata olsalar, biz turnirda albatta, yaxshi natijaga erisha olamiz”, - deydi Jasur Abduraimov.

Yig'ilishda shuningdek, bir qator futbolchilar so'zga chiqib, ularga bildirilayotgan ishonchni oqlashga astoydil harakat qilishlarini aytib o'tishdi. O'zbekiston U-19 yoshlar terma jamoasi sardori Islom Qobilov futbolchilar turnirga ham psihologik, ham taktik jihatdan tayyor ekanini takidladi: “Turnirga yaxshi tayyorgarlik ko'rdik. Biz katta va ahil oilamiz. Murabbiylar ko'rsatamalarini bajara olishimiz kerak va shundagina yaxshi natijaga erisha olamiz. Psihologik va taktik jihatdan turnirga tayyormiz”, - dedi terma jamoa sardori.

Yig'ilishda, O'FF Birinchi vice-prezidenti Sardor Rahmatullaev so'zga chiqib, O'zbekiston yoshlar terma jamoasini butun O'zbekiston ahli, muxlislar qo'llayotganini va ular yaxshi natijalar bilan yurtimizga qaytib kelishini tiladi. SHuningdek, yig'ilishda O'zbekiston Professional Ligasi Bosh Direktori Farxod Magametov, O'FF Terma jamoalar markazi Direktori Asqar Tolibjonov hamda OAV vakillari ishtirok etishdi.