SHohruz Norxonov: “Ob-havo qanday bo'lishidan qatiy nazar g'alaba qozonishga harakat qilamiz”

Ushbu turda Jizzaxning “So'g'diyona” jamoasi o'z uyida Toshkentning “Obod” klubini qabul qiladi. Bugungi uchrashuvdan oldin “Obod” jamoasi hujumchisi SHoxruz Norxonov o'z fikrlarini bildirdi. 

“Milliy terma jamoamiz JCH-2018 saralash bahslarida qatnashgani sababli ichki chempionatimizda biroz tanaffus bo'ldi. Ushbu to'xtalish paytida o'rtoqlik uchrashuvlarini o'tkazmasdan “So'g'diyona” jamoasiga qarshi jiddiy tayyorgarlik ko'rdik. O'tkazilgan mashg'ulotlar davomida ko'proq jismoniy holatimizga etibor qaratdik. To'g'ri, birinchi davrada ushbu jamoani o'z uyimizda mag'lub etgandik. Bugungi o'yin qanday bo'lishini oldindan aytib bo'lmaydi. “So'g'diyona” jamoasini har tomonlama o'rganib chiqdik. Tarkibimizda hech qanday yo'qotishlar yo'q. Barcha futbolchilar bugungi uchrashuvga tayyor. Musobaqa jadvalida bizni taqib qilib kelayotgan jamoalar ham mehmonda bahs olib boradi. SHuning uchun ham bugungi bahsda iloji boricha 3 ochkoni qo'lga kiritishimiz kerak. Avvaldan aytib o'tganimdek, biz uchun har bir ochko suv va havodek zarur. Birinchi davrada “So'g'diyona” uyimizda mag'lub bo'lgani uchun, bugun bizga qarshi bor kuchi bilan g'alaba qozonishga harakat qiladi. Ushbu jamoani muxlislari yaxshi qo'llab-quvvatlashadi. Lekin biz bunga etibor bermasdan o'z o'yinimizni ko'rsatamiz. Ob-havo qanday bo'lishidan qatiy nazar g'alaba qozonishga urinamiz. Farg'onaning “Neftchi” jamoasini mag'lub etganimizdan so'ng, barcha futbolchilarni kayfiyati ko'tarilib ketdi. Bugun g'alaba uchun maydonga tushamiz” - deydi “Obod” klubi futbolchisi SHoxruz Norxonov

Jahongir Sotvoldiev