Bugun futbol. "SHo'rtan" - "Andijon"

Oliy liga. 25-tur
SHO'RTAN - ANDIJON
Bosh hakam: Vadim Agishev
Boshlanish vaqti: 17:00

Turnir jadvalidagi o'rni: "SHo'rtan" 10-o'rinda (29 ochko), "Andijon" 16-o'rinda (16 ochko)
Ochkolar orasidagi farq - 13 ochko.  

Tarif: Oliy ligada qolish uchun harakat qilayotgan "Andijon" bugun G'uzorda "SHo'rtan" mehmoni bo'ladi. Mavsum yakuniga etayotgan bir paytda "Andijon" uchun har bir uchrashuv muhim ahamiyatga ega. Birinchi davrada "SHo'rtan"ning ahvoli chatoq edi, ammo keyinchalik g'uzorliklar birin-ketin g'alaba qozona boshlashdi va turnir jadvalidagi mavqelarini ancha yaxshilab olishdi.

Fakt: Oxirgi uch uchrashuvni ketma-ket uchta g'alaba bilan yakunlagan "SHo'rtan" ikkinchi davrani birmuncha yaxshi o'tkazmoqda. G'uzorliklar oraliq tanaffusdan so'ng uyda bo'lib o'tgan beshta o'yindan to'rttasini g'alaba bilan yakunlashdi. Buni ham yaxshi ko'rsatkich desa bo'ladi.

Fakt: "Andijon"ning safarda umuman omadi kelmayapti desa ham bo'laveradi. Jamoa safarda hozircha faqat bir marta yutuqqa erishgan. Orif Mamatkazin shogirdlari Farg'onada "Neftchi"ni 2:1 hisobida mag'lub etib qaytishgan. Ammo o'shandan beri jamoa qatorasiga beshta uchrashuvda g'alaba qozona olmadi: bir durang va to'rt mag'lubiyat.

Fakt: Andijonda kechgan birinchi davra bahsida "SHo'rtan" 3:1 hisobida zafar quchgan. Gollar: N. Yovanovich (52, penalti) – M. Murodov (28), I. Taran (56, penalti), Z. Polvonov (59).