Bugun futbol. "Bunyodkor" - "Nasaf"

Oliy liga. 25-tur
BUNYODKOR - NASAF
Bosh hakam: Ravshan Ermatov
Boshlanish vaqti: 17:00

Turnir jadvalidagi o'rni: "Bunyodkor" 2-o'rinda (51 ochko), "Nasaf" 3-o'rinda (51 ochko).
Ochkolar orasidagi farq - 0 ochko.

Tarif : Bu jamoalar o'rtasidagi o'yinni shubhasiz turning markaziy bahsi deya olamiz. Negaki, ikkala jamoa ham bir xil ochko jamg'argan, faqat "Bunyodkor" to'plar nisbatiga ko'ra "Nasaf"dan bir pog'ona yuqorida turibdi. Qarshida kechgan birinchi davra bahsida 1:1 hisobi qayd etilgandi. "Nasaf"dan Erkin Boydullaev, "Bunyodkor"dan SHahzod Nurmatov gol muallifi bo'lishgan. Toshkentda bo'ladigan o'yinda ham kimning imkoniyati yuqoriligini aytish qiyin. Ammo o'ylaymizki, jamoalar qiziqarli va kurashlarga futbol namoyish etib bera olishadi.

Fakt: "Nasaf" ikkinchi davrada hali mag'lubiyatga uchramagan yagona jamoa bo'lib turibdi: xoh uyda, xoh safarda. Qarshiliklar ikkinchi davrani qatorasiga oltita g'alaba bilan boshlashdi va navbatdagi ikki o'yinda durang o'ynashdi. O'tgan turda esa "Metallurg" 3:0 hisobida mag'lub etildi.

Fakt: "Bunyodkor" raqibidan bitta kam o'yin o'tkazgan. CHunki bu jamoaning "Olmaliq" bilan zaxirada o'yini bor. "Bunyodkor" ikkinchi davrada o'tkazgan to'rtta uy uchrashuvining barchasini g'alaba bilan yakunladi. "Qaldirg'ochlar" "Qo'qon-1912", "Obod", "SHo'rtan" va "So'g'diyona" klublaridan ustun kelishdi. Qizig'i shundaki, mana shu to'rttala o'yin ham "Bunyodkor"ning o'z stadionida emas, balki TTYMI stadionida o'tkazildi.

Fakt: "Bunyodkor" bu yil ikkinchi davra hisobidan birinchi bor o'z maydonida to'p tepadi. TTYMI stadionida bo'lib o'tgan avvalgi to'rt uchrashuvda "Bunyodkor" raqiblari darvozasiga jami 9ta gol urib, bitta to'p o'tkazgan. Jamoa bugun o'zining stadionida "Nasaf"ni mag'lub eta oladimi? Buni o'yin yakunlangach bilib olamiz.