Andrey Miklyaev: "Islom To'xtaxo'jaevning ogohlantirish olgani yaxshi bo'lmadi"

Uchrashuvdan so'ng o'tkazilgan matbuot anjumanida Andrey Miklyaev quyidagicha fikr bildirib o'tdi: 

- Uchrashuvni g'alaba bilan yakunlaganimizdan xursandman. O'yin avvalida bir nechta qulay imkoniyatlarni golga aylantira olmaganimizdan xavotirga tusha boshlagandim. Lekin ko'p o'tmay raqib darvozasi ishg'ol etildi va natijada “Mashal” oldinga o'tishga majbur bo'ldi. Biz esa raqibning “ochilgani”dan foydalanib yana 3 ta gol urishga muvaffaq bo'ldik. Bugun shogirdlarim ko'rsatgan o'yindan mamnun bo'ldim. Ularga chiroyli g'alaba uchun o'z minnatdorchiligimni bildiraman. 

Aslida bugun ilk daqiqalardan Nemanya Yanichich maydonga tushishi kerak edi. Biroq o'yin oldidan o'tkazilgan chigalyozdi mashqlari jarayonida u o'zini yaxshi his qilmayotganini bildirdi. Natijada Islom To'xtaho'jaev uning o'rnida harakat qildi. Biroq Islom ham kerak bo'lmagan joyda sariq kartochka ishlab oldi. Bu esa uning keyingi o'yinni o'tkazib yuborishini anglatadi. Oldinda bizni juda masuliyatli uchrashuvlar kutayotganini inobatga olganda, bunday yo'qotishning bizga aslo keragi yo'q edi, - deydi mutaxassis.