Saraton ustidan g'alaba qozongan sardor

Marko Russ hayotida 2016 yilning may oyidagi voqeadan yomonrog'i bo'lmagan. Avvaliga uning doping-testida qonda o'sish gormoni ko'pligi shubha uyg'otdi. Keyin, Bundesligada jon saqlab qolish uchun birinchi pley-off uchrashuviga bir kun qolganida juda yomon xabar keldi: Unda saraton aniqlandi.

Marko 31 yoshda, u "Ayntraxt" tarbiyalanuvchisi va sardori. Russning "Volfsburg"ga o'tishini hisobga olmasak, u deyarli butun faoliyatini shu erda o'tkazgan. U Saraton haqida eshitganidan so'ng, murabbiyga o'ynashda davom etishini aytdi.

Muxlislar uni haqiqiy erkak va shahar qahramoni sifatida qo'llab-quvvatlashdi. Russ pley-offning birinchi o'yinida (1:1) o'z darvozasiga gol urib, sariq kartochka oldi va keyingi uchrashuvni o'tkazib yuborishi kerak edi.

"Ayntraxt" futbolchilari javob uchrashuviga Russ familiyasi yozilgan futbolkalarda chiqishdi.

Marko yoz davomida ikkita kimyoterapiya kursidan o'tdi va kasallikdan so'ng ilk marotaba avgustda omma oldida paydo bo'ldi.

"Birinchi davolanish deyarli yaxshi o'tdi, ikkinchisida juda qiyin bo'ldi. Uch hafta yomon holatda yotdim" - deydi Russ.

Kecha (20 oktyabr) Marko to'liq tuzalgani malum bo'ldi. "SHifokorlar u futbolga qaytishi mumkinligini aytishdi. Biz juda baxtlimiz"  - deydi "Ayntraxt" ustozi Niko Kovach.

"Agar hammasi reja bo'yicha ketsa, yanvarda Abu-Dabidagi yig'inga boraman" - deya rejalari haqida so'zlab berdi futbolchi.

"Bavariya"ga qarshi bahsda Russni nemis grandining barcha futbolchilari quchoqlashdi.

Sog' bo'l, Marko!