Temurxo'ja Abduxoliqov oliy ligadagi yubiley – 50-golini kiritdi

Zero mahoratli o'yinchi tez-tez raqiblari darvozasini ishg'ol etib, “Lokomotiv”ning g'alabalariga o'zining munosib xissasini qo'shib kelmoqda.

Abduxoliqov o'tgan safar “Mashal” bilan o'yinda uchta gol urib, xet-trikka erishgandi. Bugun bo'lib o'tgan “Buxoro”ga qarshi bahsda ham Temurxo'ja Abduxoliqov o'z nomiga gol yozdirib qo'yishga erishdi. Natijada ushbu futbolchining joriy mavsumda oliy liga doirasida kiritgan gollari soni 20taga etdi. Umumiy jihatdan olib qaraganda esa u O'zbekiston chempionatidagi yubiley – 50-golini urdi. Hali oldinda yana bir nechta uchrashuv bor ekanini inobatga oladigan bo'lsak, Temurxo'ja Abduxoliqov hali o'z gollari sonini yanada orttirib olishiga ishonamiz.

SHu o'rinda takidlash joizki, shu paytga qadar “Lokomotiv”ning hech bir futbolchisi oliy ligada bir mavsum davomida 20ta gol kiritmagan edi. Faqatgina Farhod Tojiev 2013 yilgi mavsumda 17 marta raqiblar darvozasini ishg'ol qilishga muvaffaq bo'lgandi. Bu esa Temurxo'janing bir mavsumda oliy liga doirasida urilgan gollar soni bo'yicha “Lokomotiv”ning rekordchisiga aylanib olganini anglatadi.