Egor Krimec: "Hali hech bir o'yinga bu darajada tayyorgarlik ko'rmagandik"

"Tayyorgarlik juda maromida bo'ldi. Guruhimizdagi hali hech bir o'yinga bu darajada tayyorgarlik ko'rmagandik. Raqibni obdon o'rgandik. Ularning oxirgi vaqtlaridagi ko'plab o'yinlari tushirilgan diskni tomosha qildik, murabbiylar kerakli maslahatlarni berishdi. Bahraynning ojiz nuqtalari haqida mashg'ulotlar paytida murabbiylarimiz bizni boxabar qilishdi", - deya gap boshladi Egor Krimec.

- So'nggi paytlarda Krimecning o'yinlarida pasayish kuzatilmoqda. Buning sababi nimada?
- Bilmadim. Har bir o'yinga bir xil maromda o'ynashga harakat qilaman. O'yinga tayyorgarlikni doimgidek yuqori darajada o'tkazaman. So'nggi oylarda juda ko'p o'yinlarda ishtirok etganim boismi, balki biroz charchoq alomatlari sezilayotgandir. Mavsum yakuniga etib bormoqda. Jismoniy toliqish bo'lib turadi. SHu narsa o'z so'zini aytayotgan bo'lishi mumkin.

- Himoya chizig'i deyarli yangilandi. O'zaro til topishishda muammolar yo'qmi?
- O'yindan-o'yinga bir-birimizni tobora yaxshi tushunib olamiz. Buning uchun uchrashuvlar kerak. Vaqt o'tishi bilan hammasi iziga tushi ketadi deb o'ylayman. Darhaqiqat, himoya chizig'imizda yangiliklar bo'ldi. Uchrashuvlar orqali orqa chiziqdagi o'yinimizni yanada shakllantirib olamiz.

- Bahraynga qarshi o'yin oldidan jamoaning g'alabaga bo'lgan ishonchi qay darajada? Ruhiy tomonlama tayyorgarlik maromidami?
- Maydonga faqat g'alaba uchun tushamiz. Bizni maqsad va reja bitta - g'alaba. Orqaga yo'l yo'q. Guruhimizdagi vaziyat shuni taqozo qiladi. G'alabadan o'zgasi bizni qoniqtirmaydi. Jamoada ichki muhit juda yaxshi. Kayfiyatlar alo. Ruhiy tomonlama kerakli tayyorgarlikka egamiz. Barchamiz g'alabaga tashnamiz.

SHahboz Beg'amov suhbatlashdi.