Markus Reshford: “Yunayted”dagi debyutimdan faxrlanaman”

- Urgan gollaringizdan qay birini eng yaxshi deb hisoblaysiz?

- O'ylashimcha, 15 yoshda edim. O'shanda men va sherigim to'pni maydon markazidan o'yinga kiritdik. Keyin oldinga tashlandik. Ikki marta bir-birimizga to'p oshirdik va men darvozani aniq nishonga oldim. Zarbam oddiy chiqdi, ammo ungacha biz bosib o'tgan yo'l juda ajoyib ko'rinish olgandi.

- Stadionga tashrif buyurgan birinchi o'yiningiz qaysi bo'lgan?

- Bu “Manchester Yunayted”– “Real Madrid” uchrashuvi edi. Juda yosh bo'lganman va akam meni o'zi bilan birga olib kelgandi. Bu Ronaldo xet-trik qilgan o'sha mashhur bahs bo'lgandi. Birinchi bahsda menga omad kulib boqqan.

- “Fletcher Moss Reynjers” yoshlar jamoasida o'ynaganingizni bilamiz. Maktab jamoasi uchun maydonga tushganmisiz?

- Ha, dastlab maktab jamoasi uchun o'ynaganman. Besh yoshda edim, adashmasam. Keyin olti yoshlilar jamoasiga o'tganman. Bu ajoyib davrlar edi, chunki men bilan birga “Kryu Aleksandriya” kabi akademiyalarda shug'ullangan bolalar o'ynardi. Etti yoshimda maktab jamoasi uchun so'nggi marta maydonga tushganman. Keyin “Manchester Yunayted”ga qo'shilganim tufayli o'ynamaganman. Boshlang'ich maktabim “Batton-Leyn” bo'lgan, o'rta maktabda esa “Seyl Xay”ga qatnaganman.

- Faoliyatingizda qaysi voqeadan eng ko'p faxrlanasiz?

- “Manchester Yunayted”dagi debyutimdan.

- O'zingiz qatnashgan eng yaxshi uchrashuvni aytib bersangiz.

- O'tgan mavsumda “Siti” bilan safarda kechgan bellashuv. O'shanda men g'alaba keltirgan to'pni kiritgandim.

- Siz to'qnash kelgan eng qiyin raqib qaysi?

- Individual tarafdan “Arsenal”dagi Loran Koselni. U menga qarshi to'p tepgan himoyachilar ichida eng qiyin raqib bo'lgan.

- Futboldagi eng katta orzungiz nima?

- “Manchester Yunayted” bilan CHempionlar ligasini yutish. Bu ajoyib bo'lardi!

Behzod NAZAROV tayyorladi.