Oliy liga. "Neftchi"ning g'alati statistikasi

Bu mavsum ham "Neftchi" o'ziga, shonli tarixiga yarashmagan 11-o'rinni egallab turibdi.

Jamoaning bu yilgi o'yinlariga nazar tashlab, g'alati statistikaga guvoh bo'ldik. Agar Oliy liganing eng kuchli to'rt klubi bilan kechgan bellashuvlarni yodga oladigan bo'lsak, "Neftchi" o'z maydonida "Bunyodkor" va "Paxtakor"ni mag'lub etdi, "Lokomotiv" va "Nasaf" bilan durang o'ynadi. Odatda o'z maydonida grandlardan ochko oladigan jamoa chempionatda yaxshi ishtirok etishi kerak.

Lekin "Neftchi"ni bunday deb bo'lmaydi. Farg'onaliklar oxirgi beshta uchrashuvdan faqat bittasida g'alaba qozonishdi. To'rtta o'yinda esa mag'lubiyatga uchradi. Jamoa birinchi davrada hartugul olti bor g'alaba qozongandi. Ikkinchi davrada esa hozircha 3ta g'alaba mavjud. Qolaversa, "Neftchi"ning 6ta g'alabadan ikkitasi safarda qo'lga kiritilgani etiborga molik. Ammo ikkinchi davrada Andrey Fyodorov shogirdlari hozircha safarda g'alaba qozonishgani yo'q. Jamoa safarda bo'lib o'tgan hamma o'yinlarda imkoniyatni boy berdi.

"Neftchi"ning g'alati statistikasi shundaki, jamoa kerak bo'lsa o'z maydonida kuchli to'rtlik jamoalarining "dodini" bera olyapti-yu, lekin "So'g'diyona", "Andijon", "Mashal", "Obod", "Qo'qon-1912" kabi klublarga kutilmaganda yutqazib qo'yyapti. Nima sababdan bunday bo'layotgani esa bizga qorong'i.