Marat Bikmaev: "Afonin terma jamoamizni kuchaytiradi"

- Bo'lajak o'yinlarga yaxshi tayyorgarlik ko'ryapmiz. Biroz shamollab qolganim sabab bugungi (muallif: 8 noyabr kungi) mashg'ulotlarda ishtirok etolmayapman. Iordaniyaga qarshi o'rtoqlik uchrashuvi Janubiy Koreya bilan bo'ladigan bahs oldidan haqiqiy "repiticiya" vazifasini bajarib beradi. Bu o'yinda o'z kuchimizni sinab ko'ramiz.

Afonin? Afonin bilan shaxsan tanishmiz. Men uni avvaldan bilaman. Vadim Afonin terma jamoamizni kuchaytiradi. Bosh murabbiyimiz bekorga uni jalb etgani yo'q. Babayan Afoninning potencialini juda yaxshi biladi. "Rubin"da Afonin bilan birga o'ynaganman. Bu futbolchi haqida faqat iliq fikrlarni bildira olaman. Vadim Afonin juda yaxshi futbolchi.

Janubiy Koreya bilan bo'ladigan bahsga jamoamiz tayyor. Ular bilan maydonda "jang" qilishga shaymiz. Hozirgi kunda barcha jamoalar teng kuchga ega. Bundan biz ham mustasno emasmiz. Janubiy Koreyaga mag'lubiyat uchun bormaymiz. Juda qiziqarli va keskin kurashlarga boy uchrashuv bo'ladi. Umid qilamanki, biz u erda g'alaba qozonamiz.

Iordaniya bilan o'yin murabbiylar uchun juda muhim sanaladi. Aynan ushbu bellashuv orqali murabbiylar shtabi futbolchilarning funkcional holatini bilib olishadi. Muhim o'yin oldidan murabbiy qaysi futbolchilarni Janubiy Koreyaga qarshi uchrashuvga maydonga tushirishi mumkinligini ko'rib oladi. Qaysi futbolchi qanday sport formasida ekanligi ham mazkur bahsda ko'rib olishadi.

Anshlag? Iordaniya bilan bo'ladigan uchrashuvda ishqibozlar stadionni to'ldirib o'tirishadi, deb umid qilaman. Har holda terma jamoa o'ynaydi. Barcha muxlislar ertangi o'yinda stadionga kelib jamoamizni qo'llab-quvvatlashlarini istayman.

SHahboz Beg'amov