OFK BAAning "Al Nasr" klubi va futbolchi Vanderleyni jazoladi

Malumki, Dubay klubi vakillari braziliyalik futbolchi Vanderleyni OCHLda Osiyo vakili (indoneziyalik futbolchi) sifatida ro'yxatdan o'tkazib uni maydonga tushirishgandi.

Bu esa qonunga xilof sanaladi. SHu bois OFK tartib-intizom qo'mitasi mazkur ishni atroflicha o'rganib chiqib quyidagicha qarorga keldi:

1. Futbolchi Vanderley uch oy maydonga tusha olmaydi;
2. U 10 ming AQSH dollari miqdorida jarimaga tortildi;
3. "Al Nasr" klubiga 50 ming AQSH dollari miqdorida jarima solindi;
4. "Al Nasr" bu mavsum OCHLda ishlab topgan barcha mukofot pullarini OFKga qaytarib beradi (340 ming AQSH dollari);
5. Klub kelasi yil OCHLga chiqqan taqdirda ham ushbu musobaqada ishtirok eta olmaydi ("Al Nasr" ushbu mavsum yakunlariga ko'ra, OCHL-2017ga yo'l ola bilmagan, bu degani 2018 yilgi musobaqada ham qatnasha olmaydi).

Malumki, "Al Nasr" 24 avgust kuni o'tkazilgan OCHL doirasidagi "Al Jayish" bilan birinchi o'yinda yirik hisobda g'alaba qozongan va yangi futbolchi Vanderley uchta gol urgandi. O'shanda Vanderley indoneziyalik futbolchi sifatida "Al Nasr" tarkibida maydonga tushgan, bu esa OFKning legionerlar bo'yicha 3+1 limitiga hech qanday "tasir" o'tkazmagandi.

Mana endi baribir jinoyat jazosiz qolmadi va tashkilot BAA klubi hamda uning futbolchisini munosib tarzda jazoladi.