Timur Kapadze: “Bizning futbolchilar g'alabaga munosib”

Ushbu o'yin oldidan Toshkentning “Lokomotiv” klubi va O'zbekiston milliy terma jamoasi sobiq futbolchisi Timur Kapadze vakillarimizni qo'llab-quvvatlab, ularga omad tiladi.

-  Milliy terma jamoamizni ertaga juda ham muhim bo'lgan o'yin kutib turibdi. Vakillarimiz kamida durang natija qayd etishlari kerak. G'alaba qozonsa nur ustiga alo nur bo'lardi. To'g'ri, bu oson bo'lmaydi. Janubiy Koreya terma jamoasi ham Osiyoda kuchli hisoblanadi. Raqib jamoaning hujumchilariga qarshi himoyamiz mustahkam turib bera olsa, o'ylaymanki barchasi biz kutgandek bo'ladi. Menimcha, Janubiy Koreyaning nozik joyi himoya. Oxirgi 3-4 yil ichida Janubiy Koreya terma jamoasida muammolar paydo bo'ldi. CHunki avvalgi Koreya kamdan-kam vaziyatlarda ochko yo'qotardi. Har doim barqaror o'yin ko'rsatib, g'alabani muddatidan oldin naqd qilishar edi. Ayni damda raqiblarimiz oldigidek kuchga ega emas. Hozir ulrada saviyali legioner futbolchilari bor, lekin ular ikki, uch nafarni tashkil etadi. Ko'rinib turibdiki ularda jamoaviy o'yin yaxshi emas.

-  Har doim safardagi o'yinlar qiyin bo'lgan. Janubiy Koreyaga qarshi qanday futbol o'ynash kerak, deb o'ylaysiz?
-  To'g'ri, “Osiyo yo'lbarslari” maydonda juda ham tez harakat qiladi. ularga qarshi ochiq futbol o'ynash xavfli. O'ylaymanki, murabbiylarimiz raqib jamoani har taraflama yaxshi o'rganib chiqib bahsga to'g'ri strategiyani tanlab chiqishsa natija biz kutgandek bo'ladi. Futbolchilarimizning ulardan kam joyi yo'q. Albatta, barchamiz shuni istagan holda vakillarimizga kuch-quvvat, omad yor bo'lishini tilab qolamiz. Bu futbol kimdir g'alaba qozonadi, yana kimdir mag'lub bo'ladi. Lekin bizning futbolchilar g'alabaga munosib.

Jahongir Sotvoldiev