SHavkat Saidov: "Lokomotiv"ni g'alaba va chempionlik bilan tabriklaymiz"

SHavkat Saidov, “Metallurg” FK jamoa boshlig'i: - Avvalo, “Lokomotiv”ni muddatidan oldin chempionlikka erishganligi bilan tabriklayman. Bizga qarshi o'yindan bir kun muqaddam temiryo'lchilarning chempion bo'lganligi haqidagi xabar nazarimda o'yinning shiddatli o'tishiga biroz salbiy tasir ko'rsatdi. Mezbonlarga qaraganda ham bizning futbolchilarimizda “kurashish ishtiyoqi” pasayganligi sezildi. Yangi chempionga qarshi 20 daqiqa jiddiy raqobat ko'rsatishga kuchimiz etdi. Ketma ket o'tkazib yuborilgan gollar esa o'yinchilarimizning o'z kuchlariga bo'lgan ishonchlarini so'ndirdi. “Lokomotiv” bu yil mavsumni juda ko'tarinki tarzda, chempionga xos va mos tarzda o'tkazdi. Jamoada teng kuchli ikkita tarkib mavjud. Zahiraning kuchliligi bois barcha raqiblaridan ustun ekanligi sezilib turdi. Temiryo'lchilarga endi xalqaro maydonlarda ham yurtimiz sharafini munosib himoya etishlarini tilab qolamiz.

Biz uchun esa mavsum hali yakunlangani yo'q. Keyingi o'yinga, o'z uyimizdagi oxirgi uchrashuvga tayyorgarlikni boshlaymiz. Muvaffaqiyatli o'tgan mavsumni ishqibozlarimiz qarshisida g'alaba bilan yakunlashni xohlaymiz, deydi SHavkat Saidov.

"Metallurg" matbuot xizmati