To'yonaga 10-bronza!

1986 yilda tashkil etilgan "Nasaf" klubi joriy mavsumda o'zining 30 yilligini nishonlamoqda. Ro'ziqul Berdiev boshchiligidagi jamoa 30 yillik to'yonaga 10-bronzani taqdim etdi.

1997 yildan buyon Oliy ligada uzluksiz ishtirok etib kelayotgan "ajdarlar" bu vaqt mobaynida 10 marotaba bronza, bir bor kumush medali, O'zbekiston kubogi hamda O'zbekiston Superkubogini qo'lga kiritishgan. Klub o'z tarixidagi eng ajoyib mavsumni 2011 yilda o'tkazgan. Aynan o'sha yili "Nasaf" OFK kubogi va chempionatdagi hozirga qadar eng yaxshi natijasi bo'lgan kumush medallariga ega chiqqandi.

"Nasaf" shu kungacha oliy ligada jami 587 ta uchrashuv o'tkazgan. SHundan 329 tasida g'alaba qozongan, 112 ta durang va 146 ta mag'lubiyat qayd etgan. To'plar nisbati 1067-665.

NASAF (QARSHI) FUTBOL KLUBI TARIXIDAN
Jamoa mamlakat oliy ligasida 1997 yildan beri ishtirok etadi.

Erishgan yutuqlari:

O'zbekiston chempionatining oliy ligasida o'n marotaba (2000, 2001, 2005, 2006, 2009, 2010, 2013, 2014, 2015, 2016 yillar) bronza medali sovrindori.

O'zbekiston vice-chempioni, kumush medal sohibi (2011).

O'zbekiston kubogi ( 2003y, 2011y. 2012, 2013 y.) finalchisi.

O'zbekiston kubogi sohibi (2015).

O'zbekiston superkubogi sohibi (2016).

Osiyo chempionlari kubogi (2002 yil) yarim finalchisi, OFKning Halol o'yin uchun sovrini (2002 yil) sohibi.

Osiyo futbol konfederaciyasi kubogi sohibi (2011), musobaqaning “Halol o'yin uchun” sovrini egasi.

Jamoa tarkibida eng ko'p maydonga chiqqan o'yinchi - Ro'ziqul Berdiev (314 marotaba).

Jamoaning eng yaxshi to'purari - Zafar Xolmurodov (181 ta).

Bir mavsumda eng ko'p to'p kiritgan futbolchi- Zafar Xolmurodov (30 ta, 2000 yil).

Eng yirik g'alabasi - 7:0 (Metallurg Bekobod, 2004 yil), 8:1 (Andijon, 2004 yil).

Eng yirik mag'lubiyati - 0:6 (Andijon, 1998 yil).