O'zbekiston va Turkmaniston Prezidentlari “Bunyodkor” stadioniga tashrif buyurishdi

O'zA xabariga ko'ra, Islom Karimov va Gurbanguli Berdimuhamedov tor doiradagi muzokaralar chog'ida mamlakatlarimiz o'rtasidagi hamkorlikning bugungi holati va uni yanada rivojlantirish istiqbollarini muhokama etdilar, dolzarb mintaqaviy va xalqaro masalalar yuzasidan fikr almashdilar.

Muzokaralar yakunida O'zbekiston Respublikasi Prezidenti Islom Karimov va Turkmaniston Prezidenti Gurbanguli Berdimuhamedov Qo'shma bayonotni imzoladilar. Ikki mamlakat hukumatlari, vazirlik va idoralari o'rtasida iqtisodiyot, transport, bojxona, turizm, fan-texnika, sog'liqni saqlash va sport sohalaridagi aloqalarni izchil rivojlantirishga doir qator hujjatlar imzolandi.

Kunning ikkinchi yarmida O'zbekiston Prezidenti Islom Karimov va Turkmaniston Prezidenti Gurbanguli Berdimuhamedov Mustaqillik maydoniga tashrif buyurdilar. Ikki davlat rahbarlari “Bunyodkor” stadionini ham borib ko'rdilar. Ushbu majmuaning ko'rku salobati, memoriy echimi, sportchilar va tomoshabinlar uchun yaratilgan zamonaviy shart-sharoitlar oliy martabali mehmonda katta taassurot qoldirdi.