Andrey Fyodorov: "Murod Ismoilovning qon bosimi ko'tarilib ketdi"

"Yigitlarni ruhiy tomonlama tayyorlash kerak edi. 3ta mag'lubiyat yigitlarga qattiq tasir qilgandi. Bugungi o'yinda g'alaba qozonishimiz shart edi. Asosiy maqsad g'alaba qozonish edi", - deydi Fyodorov.

- Bugun Murod Ismoilov zaxira o'rindig'ida ham ko'rinmadi...

- U mag'lubiyatlarni juda ham yuragiga yaqin oladi. "Lokomotiv"dan keyin o'zini biroz yomon his qildi, "Navbahor"ga qarshi o'yindan so'ng qon bosimi ko'tarilib ketdi. SHu sababli shifokorlar unga biroz dam olishni maslahat berishdi. Murod Ismoilov bugun uchrashuvni tomoshabinlar orasida kuzatib bordi. Keyingi o'yinlarda yana o'z o'rniga qaytishiga umid qilamiz.

- So'nggi paytlarda jamoa hujumkor o'yin namoyish etmayotgani aytilmoqda. Masalan, Vadim Abramov ham, Rustam Mirsodiqov ham shunday dedi. Bunga fikringiz?

- Menimcha barcha ikkinchi bosqichning dastlabki uchta o'yiniga qarab baho bermoqda. Sababi ilk davrada ajoyib o'ynagandik. "Lokomotiv"ga qarshi o'yinda himoyadan o'ynaganimiz rost, sababi raqib juda kuchli edi, buni tan olish kerak. "Navbahor" bilan o'yinda esa hujumkor o'ynadik. Bugun aytganimdek asosiy maqsadimiz g'alaba edi, chiroyli o'yin ikkinchi darajali edi.  

- Namanganda balki o'zgarishlarni kech amalga oshirib xato qilgandirmiz. Bugun esa natija ustuvor edi, shu bois g'alabali hisobni ushlab qolishga urindik. "Metallurg" kuchli raqib, ularda tajribali futbolchilar juda ko'p. Bekobod klubidan bitta ko'p gol urib g'alaba qozondik.

- Yana g'alabali seriyaga qaytishga umid qilamiz. Ammo g'alaba qozonish juda qiyin, ketma-ket g'alaba qozonish esa undan ham og'ir. 

Komiljon Ikromov yozib oldi