SHerzod Rayimjonov: "Neftchi" Turkiyada xorijiy yig'in o'tkazishni rejalashtirmoqda"

“Qura bu qura. Unga ko'ra yangi mavsumni safarda “SHo'rtan”ga qarshi o'yin bilan boshlaymiz. G'uzordagi stadion maydoni yaxshi holatda bo'ladi deb o'ylayman. Ikkinchi turni esa o'z uyimizda “Paxtakor” bilan o'tkazamiz. Ochilish o'yini bu muxlislarimiz uchun haqiqiy bayram bo'ladi. Qisqa qilib aytganda ilk turlardan bizni jiddiy o'yinlar kutmoqda. Ochko yo'qotishga haqqimiz yo'q. Mavsumni ijobiy kafiyatda boshlashga ko'p narsa bog'liq. 

Yangi mavsumga tayyorgarlikka kelsak Yangi yil bayramiga qadar 10 kun Farg'onada shug'ullanamiz. Jamoamiz 4 yanvar kuni Toshkentga kelib tibbiy ko'rikdan o'tadi. 5-10 yanvar kunlari Farg'onada yig'in o'tkazamiz. Keyin 12-25 yanvar oralig'ida Toshkentda yig'in olib boriladi. Bu yig'in doirasida 5ta o'yin o'rtoqlik o'yini rejada bor. 29 yanvardan 9 fevralga qadar Farg'onada Hokim kubogi musobaqasi bo'lib o'tadi. Tashkilotchilar bu yilgi musobaqani xalqaro darajaga olib chiqishmoqchi. Qirg'iziston, Tojikiston klublariga takliflar yuborilgan. “Qizilqum” va “Mashal” klublari ham taklif etilgan. 

Hokim kubogidan so'ng 12 fevraldan ikki hafta davomida Turkiyada xorijiy yig'in o'tkazishni rejalashtirib turibmiz. Agar barchasi yaxshi bo'lsa “Neftchi” bu yil xorijda yig'in olib boradi. Turkiyadan qaytib kelgach mart oyi boshida Farg'onada o'z bazamizda birinchi turdan o'rin olgan “SHo'rtan” bilan o'yinga tayyorgarlik ko'ramiz”, - deydi “Neftchi” klubi sport direktori SHerzod Rayimjonov.