Markaziy Osiyoning eng yaxshilari kim?

Bazi mintaqalar o'zlarining rasmiy musobaqalariga ega - ASEAN, Janubiy, G'arbiy va SHarqiy Osiyoda terma jamoalar o'rtasida turnirlar tashkil etiladi. Hozircha birgina Markaziy Osiyo asosiy terma jamoalar uchun musobaqaga ega emas. Biz ushbu mintaqaga ko'proq urg'u berishni istagan holda 2016 yil Markaziy Osiyo hududida eng yaxshi ko'rsatkichlarga ega bo'lgan murabbiylar va futbolchilar ro'yxatini tuzib chiqishga qaror qildik.

Aytish lozimki, murabbiylarni aniqlashda ularning jamoalari bilan qo'lga kiritgan natijalariga etibor qaratdik. CHunki kimning qanday o'ynayotganini kuzatib borishning imkoni doim bo'lmaydi. Kelasi yil barcha jamoalar yil davomida jahon chempionati va Osiyo Kubogi saralash bahslarida ishtirok etishadi. Rasmiy bellashuvlarni bemalol ko'rib borish imkoniyati yuzaga keladi.

Terma jamoalar ichida eng yaxshi ko'rsatkich qayd etgan uch terma jamoa shunday tartibda joylashdi - Eron, O'zbekiston va Tojikiston. Eron 2016 yil 10 uchrashuvda maydonga tushib, 8 g'alaba va 2 durang qayd etdi. Jamoa ikki gol o'tkazib yubordi xolos. Karlush Keyrush ilgari hujumkor futbol ko'rsatgan jamoani raqibga himoyada imkon qoldirmaydigan jamoaga aylantirib ulgurdi. O'zbekiston yildagi 12 o'yindan 9tasida g'alaba qozonib, 3 bor mag'lubiyatga uchradi. Jahon chempionati saralash bosqichida hozircha Eron vakillarimizni 2 ochkoga ortda qoldirmoqda.

Tojikiston 9 bellashuvning 4tasida g'alaba, 3tasida durang va 2tasida mag'lubiyat qayd etdi. Yangi murabbiy Hakim Fuzaylov 7 uchrashuvda 4 yutuq va 3 durangga erishgan. Faqat yon qo'shnilarimiz asosan o'rtoqlik o'yinlari o'tkazish bilan mashg'ul bo'lishdi. Kelasi yil Fuzaylovning jamoasini saralash bahslarida kuzatib boramiz.

Aleksandr Krestinin boshchiligidagi Qirg'iziston 3 g'alaba, 2 durang va 3 mag'lubiyat qayd etdi. Qozog'istonni enggan jamoa Filippinga imkoniyatni boy bergani ajablanarli hol bo'ldi. Rossiyalik mutaxassis bu jamoada barqarorlikni taminlay olsa, ishlari yanada yaxshi kechishiga shubha yo'q.

Afg'oniston esa Petar SHegrt qo'l ostida 6 o'yinda 1 g'alaba va 1 durang qayd etib, o'sish tomon qadam tashlaganini isbotladi. Turkmaniston termasi 1 g'alaba hamda 3 mag'lubiyat qayd etdi. Omonqilich Qochumov boshchiligidagi jamoa unchalik ko'p o'yinlar o'tkazmadi.

Terma jamoalar murabbiylari borasidagi reytingimiz natijalarga monand ko'rinish oldi - Karlush Keyrush, Samvel Babayan, Hakim Fuzaylov. Ushbu uch mutaxassisni Markaziy Osiyo mintaqasida 2016 yil terma jamoalardagi eng yaxshi murabbiylar deb aytishimiz mumkin. Keyrush Eron termasi bilan erishgan natijalari sababli mintaqamizning eng yaxshi mutaxassisi degan nomga loyiq bo'ldi.

Klublar o'rtasida yagona g'olibni takidlab o'tamiz. Barcha chempionatlarni kuzatib borish imkonsiz bo'lgani sababli o'rtamiyona "Istiqlol" Xuziston bilan Eron chempionatida zafar quchgan Abdulloh Veysini klub murabbiylari orasida eng yaxshi deb etirof etdik. 2013 yil ushbu jamoa bilan birinchi ligada g'olib chiqqan Veysi uch yil ichida "Istiqlol"ni Eron chempioniga aylantirdi. Jamoa tarkibi esa u qadar kuchli emasdi.

Futbolchilar ichida kimlarni alohida ko'rsata olamiz? Nomzodlar aniq - Sardor Azmun, Mehdi Taremi, Alirizo Jahonbaxsh, Odil Ahmedov va Vitaliy Denisov. Azmun yil davomida "Rostov" safida 12 gol urdi (ECHLda 4 gol) va Eron uchun ham 4 to'p kiritdi. Mehdi Taremi Eron chempionati yulduziga aylanib bo'lgan. Jahonbaxsh AZ tarkibida 9 gol urdi va etakchilardan biriga aylandi. Ahmedov "Krasnodar" va O'zbekiston terma jamoasida katta ahamiyat kasb etgan futbolchi sanaladi. U termamiz o'yinini keskin darajada o'zgartirib yubora oladi. Denisov klubi bilan juda yaxshi natija qayd eta olmayotgan bo'lsa-da, individual tarafdan yorqin o'yinlari bilan yodda qoldi. Kuchli uchlikka Sardor Azmun, Odil Ahmedov va Vitaliy Denisovni kiritdik. Rossiya chempionati saviyasi ayni paytda Eron va Gollandiya ligalariga nisbatan yuqoriroq hisoblanadi. SHu sababli ushbu chempionatda o'ynayotgan va terma jamoalarida etakchi rollarda gavdalanayotgan futbolchilarni uchlikka qo'ydik.

Behzod Nazarov