"Dinamo": Yil yakunlariga bag'ishlangan tadbir bo'lib o'tdi FOTO

Unda Samarqand shahar hokimi, Dinamo PFK prezidenti Akbar SHukurov, Nuroniy jamg'armasi Samarqand viloyat bo'limi raisi Hasan Norbekovich Normurodov, viloyat futbol federaciyasi vice-prezidenti SHuhrat Sayfullaev hamda Dinamo klubi azolari va futbol jamoatchiligi vakillari ishtirok etishdi.

Dastlab, tadbirda shahar hokimi va klub prezidenti Akbar Safarovich so'zga chiqib, Dinamo jamoasini Oliy Ligaga chiqqani bilan tabrikladi.

Viloyatimizning bosh jamoasi Dinamoning Oliy Ligaga qaytgani samarqandlik minglab muxlislarni xursand qildi. Ilhom SHaripov qo'l ostidagi jamoa oldidagi vazifani poydevori samarqandlik mahalliy yosh futbolchilar asosida tashkil etilgan tarkib bilan bajargani quvonarli holat. O'ylaymanki, Dinamo jamoasi yangi mavsumga ham puxta tayyorgarlik bilan kirishib, muxlislar ishonchini oqlaydi. Kirib kelayotgan yangi yil barchamiz uchun omadli va zafarli kelsin - dedi Akbar Safarovich.

SHundan so'ng, Nuroniy jamg'armasi Samarqand viloyat bo'limi raisi, jamoaning jonkuyar muxlisi Hasan Norbekovich Normurodov so'zga chiqib, Dinamo jamoasining Oliy Ligaga qaytgani bilan tabriklab, futbolchilarga mamlakatimizda o'z o'rniga ega bo'lgan Samarqand futboli tarixi haqida so'zlab, shaharga munosib futbolchilar bo'lib etishishlarini tiladi.

O'z o'rnida Dinamo klubi bosh murabbiyi Ilhom SHaripov bildirilgan ishonch va yil davomida jamoani har tomonlama qo'llab-quvvatlagan viloyat hamda klub rahbariyatiga o'z minnatdorchiligini bildirdi.

SHu kuni Dinamo PFK futbolchilariga Birinchi Liga g'olibi sifatida medallar va faxriy yorliqlar topshirildi.

Bayram tadbirida O'zbekiston xalq artisti Mardon Mavlonov boshchiligidagi samarqandlik el suygan sanatkorlar ham ishtirok etib, marosimning ko'tarinki kayfiyatda o'tishini taminlashdi.

Bayramona kayfiyatda o'tgan tadbir yakunida ashaddiy ishqibozlar va viloyatimiz futbol faxriylari ham Dinamoga yangi mavsumda omad va zafarlar tilashdi.

Dinamo klubi matbuot xizmati.