Odil Ahmedov: "Xitoyga o'tish ortga tashlangan qadam emas"

"Menda Xitoy klublari bilan birga, Evropadan ham takliflar bor edi. Biroq, barchasini o'ylab ko'rdim va shu qarorga keldim. Sababi Xitoyga o'tish "Krasnodar"ga maksimal foyda keltirardi. Xitoy chempionatiga o'tish ortga tashlangan qadam deb o'ylamayman, sababi hozir bu chempionatda jahonning eng kuchli futbolchilari o'ynashmoqda va eng kuchli murabbiylari ishlashmoqda. Qaror qabul qilishdan oldin Villash-Boash bilan gaplashib oldim. U jamoadagi vaziyat haqida gapirdi, mening jamoadagi rolimni aytib berdi, shundan keyin o'tishga qaror qildim", - deydi Ahmedov.

"Mening transferim terma jamoaga foydali bo'ladi, sababi meni terma jamoa ustozlari kuzatib borishadi", - deydi futbolchi.

"Afsuski, jamoa bilan xayrlasha olmadim, sababi tatil boshlanishi bilan uchib ketgandim. SHartnomaga qo'l qo'yishdan oldin Sergey Galickiyga qo'ng'iroq qildim, bir birimizga omad tiladik. Sergey Nikolaevich kabi insonlar Rossiya futboliga juda kerak, sababi u mamlakat futboliga ko'p ishlar qilmoqda. Unga jamoa bilan birga Rossiya chempioni bo'lishini tilayman, zero u bunga haqli", - deydi Ahmedov.

Ahmedov "Krasnodar"ga 2014 yilda "Anji"dan ko'chib o'tgandi. Bu klub safida hamyurtimiz 101ta o'yinda maydonga tushib 7ta gol urdi va 13ta golli pas oshirdi. Klub tarkibida Rossiya chempionati bronza medali sohibiga aylandi va Rossiya Kubogi finaliga chiqdi. 2014/15 yilgi mavsumda "Krasnodar"ning eng yaxshi futbolchisi deb topilgan edi.