Otaxonov "Navbahor" safiga qo'shildi, G'ofurov ham keladi

Xususan bugun o'tkazilgan kechki mashg'ulotda tarkibga 2016 yilgi mavsumni “Paxtakor” jamoasida o'tkazgan Abbos Otaxonov qo'shildi. 1995 yilning 25 avgust sanasida tug'ilgan futbolchi maydonda himoyachi sifatida to'p suradi. SHu paytga qadar jamoamiz safiga olti nafar yangi futbolchi kelib qo'shildi. Namanganda o'tgan dastlabki yig'inda “Paxtakor”dan hujumkor yarim himoyachi Ravshan Xursanov jalb etilgan bo'lsa Toshkentdagi mashg'ulotlar chog'ida darvozabon Akmal Tursunboev, himoyachi Hasanboy Ergashev, yarim himoyachi Alisher Mirzaev va hujumchi Farruh SHotursunovlar ham jamoamiz tarkibidan o'rin olishgandi.

Ertaga bo'lib o'tadigan mashg'ulotlarda jamoamiz bilan birgalikda yarim himoyachi Mirzohid G'ofurov ham qatnashishni boshlaydi. Namangan futboli tarbiyalanuvchisi bo'lgan G'ofurov bir necha yillardan beri Muborakning “Mashal” jamoasi sharafini himoya qilib kelayotgandi. O'tgan mavsum boshida jamoamizning sobiq bosh murabbiyi Rashid G'ofurov ukasini “Navbahor”ga chaqirgandi. Lekin, o'shanda Mirzohidning Namanganga qaytishi amalga oshmagandi.  Bundan tashqari murabbiylar shtabida Jamshid Umarov ham faoliyat olib boradigan bo'ldi. SHu o'rinda tarkibni kuchaytirish va raqobatni oshirish maqsadida bir qator futbolchilar bilan muzokaralar davom etayotganligini qo'shimcha qilish joiz. Tomonlar o'zaro kelishuvga kelishgach, jamoaga chaqirilgan futbolchilar mashg'ulotlarga qo'shilib borishadi.