"SHo'rtan": Vagapov, Isroilov, Sobirxo'jaev, Jo'raboev keldi
/ Kiritdi: BestMaster O'qilgan: 837
Yangi yilning 5 yanvarida Toshkentga jo'nab ketgan G'uzorning “SHo'rtan” jamoasi joriy mavsumga tayyorgarlikning navbatdagi bosqichini poytaxtda o'tkazmoqda.
Ushbu oyning 19 sanasigacha o'tkazilishi rejalashtirilgan qishki o'quv-yig'in mashg'ulotlari davomida “Oq bo'rilar” o'z safiga ko'rikdan o'tish uchun bir nechta yangi futbolchilarni jalb etishgan. Azamat Isroilov, Ruslan Vagapov, Saidkamol Akabrov, Aziz G'ulomxo'jaev, Sardor Sobirxo'jaev, Qadamboy Nurmetov va Obid Jo'raboevlar shular jumlasidandir.
“SHo'rtan” jamoasini tark etgan futbolchilar ham yo'q emas. Bunga misol qilib, Sunnatilla Mamadaliev va Hasanboy Ergashevlarni ko'rsatish mumkin.
Ushbu o'quv-yig'in yakunida “SHo'rtan” jamoasi murabbiylar shtabi bitta nazorat uchrashuvi o'tkazishni rejalashtirishgan.
Darvoqe, G'uzorliklarning murabbiylar shtabida ham o'zgarishlar bo'lib o'tmoqda. Mavsum boshida jamoani murabbiy-selekcioner Ruslan SHaymardanov, jismoniy tayyorgarlik bo'yicha murabbiy Zoir Xasanovlar o'z xohishiga binoan tark etgan bo'lsalar, kuni kecha “SHo'rtan” jamoasi rahbariyati o'tgan yilgi mavsum boshida jamoa bosh murabbiy vazifasiga tayinlagan, ammo shartnomani imzolagach, bir necha kundan so'ng “Navbahor”ga o'tib ketgan tajribali mutaxassis Aleksandr Volkov bilan yana kelishuvga erishdi. Bu safar Volkov “SHo'rtan”da yordamchi murabbiy vazifasida faoliyatini boshladi.
Bosh sahifaga
480