Sanjar SHoahmedov: “Abduxoliqov bilan bir jamoada to'p tepishimiz zo'r bo'ldi”

“Qatar klublaridan bir qator takliflar bor edi. Taklif bildirgan barcha klub shart-sharoitlari bilan tanishib chiqib "Al Sayliya" jamoasi taklifini qabul qildim.

Kuni kecha jamoaning barcha shart-sharoiti bilan tanishib chiqdik. Nasib qilsa ushbu klubda chiroyli o'yin ko'rsatishga harakat qilamiz.

“Lokomotiv” klubidagi jamoadoshim Temurxo'ja Abduholiqov bilan "Al Sayliya"da birga to'p tepadigan bo'ldik. Bu Temurxo'ja uchun ham, men uchun ham juda ham zo'r bo'ldi. Ikkimiz ham bundan xursand bo'ldik. "Al Sayliya" klubi oldiga yaxshi o'yin ko'rsatib yuqori o'rinlarni egallab, chiroyli natija ko'rsatish vazifasi qo'yilgan.

Jamoada bizdan tashqari Ruminiya, Bahrayndan legioner futbolchilar bor. Qatar klubida o'zimizni sinab ko'rishni istaganimiz uchun ushbu jamoani tanladik.

"Al Sayliya" bilan bir yarim yilga shartnoma imzoladik. Klub rahbariyati bizga juda ham zo'r sharoitlar yaratib berdi. Uy, mashina deganlaridek barchasini amalga oshirib berishdi. Bu borada hech qanday muammo yo'q. Jamoa murabbiyi tunislik ekan.

Til borasida biroz muammolar bor edi. Lekin bizga tarjimonlar taqdim etishdi, hammasi ko'ngildagidek. Bizni shunchalik qo'llab-quvvatlab turgan muxlislarimizga, barcha shart-sharoitlar qilib bergan “Lokomotiv” klubi rahbariyatidan tortib, barcha ishchilariga o'z minnatdorchiligimni bildiraman. “Lokomotiv” jamoasi orqali shu darajaga etishdim. Bir umr ushbu jamoadan qarzdorman”, - deydi "Al Sayliya" futbolchisi Sanjar SHoahmedov.

Jahongir Sotvoldiev