Frantsiyada yil uchrashuvi, «Real» «Sosedad»ga qarshi va uik-endning boshqa eng muhim uchrashuvlari anonsi

Hafta so'nggiga kelib Evropada yana milliy chempionat o'yinlari davom ettiriladi. Bu hafta uik-endi Angliyada kubok o'yinlari o'tkazilishi sabab, premer-ligada qisqa tanaffus yuzaga keladi. Ammo shunga qaramay, Evropaning boshqa hududlarida bir qator qiziqarli uchrashuvlar bo'lib o'tishi kutilmoqda. Tribuna.Uz uik-endning eng muhim beshta uchrashuvi anonsi bilan tanishtiradi.

 

REAL MADRID – REAL SOS'EDAD (30 yanvarga o'tar kechasi, 00:45, UzReport TV)

«Real» o'zining eng og'ir davrlarini o'tkazmoqda. Jamoa barcha musobaqalarni qo'shib aytganda so'nggi beshta uchrashuvning faqat bittasidagina g'alaba qozona oldi. O'sha uchrashuvlarda madridliklar darvozasiga 10ta gol kiritildi. Hafta o'rtasida Zidan jamoasi «Selta» qarshi o'z uyidagi uchrashuvdagi mag'lubiyati sabab, Ispaniya qirolligi kubogidan ham chiqib ketishiga to'g'ri keldi.
 
Ikki hafta oldin ham 40ta uchrashuvdan buyon mag'lubiyat nimaligini bilmay turgan jamoa ketma-ket mag'lubiyatlarga uchray boshladi. Ammo bu bilan jamoadagi muammolar tugab qolgani yo'q. Madridliklar asosiy tarkibining bir yo'la to'rtta futbolchisi jarohat olib safdan chiqqan. Modrich, Marselo, Pepe, Karvaxallar jamoaning chempionlar ligasidagi dastlabki uchrashuvida ham jamoaga yordam bera olishi so'roq ostida turibdi. Qo'shimchasiga Xames Rodrigesda ham mushaklari bilan bog'liq muammolarga duch kelgan. Ronaldu «Selta»ga qarshi uchrashuvdagi jarima zarbasini aytmaganda, deyarli gol urmay qo'ydi. Benzemaniku gapirmasa ham bo'ladi. Ammo Zidan unga ishonch bildirishda davom etmoqda. Bu esa boshqa bir hujumchi Morataga yoqmayapti. Alvaro jamoani tark etish istagida.

«Real Sosedad» uchun ham so'nggi birni omadli keldi deyish qiyin. Avvaliga «Sevilya»ga 4:0 hisobida imkoniyatni boy bergach, chempionatdagi ikkita uchrashuvda g'alaba qo'lga kiritildi. Biroq kubok chorak finalida «Barskelona»ga qarshi ikki uchrashuvda jamoa o'ziga xos bo'lmagan tarzda 6ta gol o'tkazib yubordi. Umuman oxirgi beshta uchrashuvda jamoa 10 gol o'tkazib yuborgani ham joriy mavsumdagi eng yomon ko'rsatkichi sanaladi. So'nggi 10 yilda jamoa birinchi marta «Anoeta»da «Barselona»ga imkoniyatni boy berib qo'ydi. 

Ikki murakkab davrni o'tkazayotgan jamoalar uchrashuvi qaysidir klubning bu muvaffaqiyatsiz davrdan chiqib ketishiga yordam berishi mumkin. Albatta «Real» Madridda o'ynaydi va uchrashuvning yaqqol favoriti. Boz ustiga birinchi davrada San-Sebastyandagi uchrashuvda madridliklar yirik, 3:0 hisobida g'alaba qozongani ham buni tasdiqlab turibdi.

 

RB LEYPTsIG – HOFFENHAYM-1899 (28 yanvar, 19:30, Match! Futbol 2)

Bundan 5-6 oy oldin kimdir yanvarning oxirgi haftasiga kelib, Germaniyada turning eng markaziy uchrashuvi «Leyptsig» va «Hoffenhaym» o'rtasidagi kechadi deyishganida bunga hech kim ishonmasligi tayin edi. Ammo bugunga kelib aynan shu juftlik nafaqat turning, balki mavsumning eng muhim uchrashuvlaridan biriga aylandi.

«Leyptsig» birinchi davradagi fantastik seriyasidan so'ng, oxirgi ikki uchrashuvda jamoa «Ingolshtadt» va «Bavariya»ga yutqazib qo'ydi. O'tgan haftada «Ayntraxt»dan yirik hisobda ustun kelgan Xazenhyuttl shogirdlari jamoa kurashdan chiqib ketmaganini isbotlay oldi.
«Hoffenhaym» esa Evropada mag'lubiyat nimaligini bilmay kelayotgan yagona jamoa unvonini hamon himoya qilmoqda. Davralar oralig'idagi tanaffusdagi ikkita o'yinni ham qo'shib hisoblasak, Nagelsmann shogirdlari so'nggi 5ta uchrashuvning to'rttasida g'alaba qozongan. Ammo faqat chempionat o'yinlarini aytadigan bo'lsak, «Hoffenhaym» so'nggi 8 uchrashuvda faqatgina 2 marta g'alaba qozongan, olti durang.
Jamoalarning birinchi davradagi uchrashuvida ham g'olib aniqlanmagandi. Marsel Zabittser tomonidan hakam tomonidan qo'shib berilgan daqiqalarda kiritilgan gol «Leyptsig»ning bugungi ajoyib natijalariga qaysidir ma'noda debocha bo'lib bergandi. «Leyptsig» o'z uyida kechadigan uchrashuvlarda so'zsiz favorit. Ammo «Hoffenhaym» hattoki «Bavariya»ga qarshi uchrashuvda ham mag'lubiyatga uchramaganini hisobga olsak, bu uchrashuvda ham seriya davom etishini kutishimiz mumkin.

 

PSJ – MONAKO (30 yanvarga o'tar kechasi, 01:00, Match TV)

 

«Nitstsa» uzoq muddat Ligada peshqadamlik qilganiga qaramasdan, ko'pchilik aynan shu ikki jamoa chempionlik uchun kurashishini bashorat qilishgandi.

«Nitstsa» so'nggi o'yinlarda asta-sekin bu gaplar to'g'ri ekanini isbotlamoqda. «Monako» uzoq davom etgan tanaffusdan keyin o'tgan haftada yakka peshqadamga aylanib oldi, «PSJ» esa hozircha «Nitstsa»dan bir ochkoga ortda qolmoqda. Mavsumning eng muhim uchrashuvidagi g'alaba nafaqat «Nitstsa»ni quvib o'tishga, balki «Monako»ga ham etib olish imkoniyatini taqdim etishi mumkin. 

Parijliklar «Monpele» «Nitstsa» va «Gengam»ga qarshi uchrashuvlardagi muvaffaqiyatsiz o'yinlardan keyin so'nggi beshta uchrashuvda g'alaba qozondi. G'alabali seriyada to'plar nisbati 16:1 ko'rinishida bo'lgan. Hafta o'rtasida «PSJ» liga «Bordo»ni yirik hisobda engib liga kubogi finaliga yo'llanma oldi. Darvoqe u erda ham Emeri shogirdlariga «Monako» raqiblik qiladigan bo'ldi. Umuman jamoada barchasi joyiga tushib olgandek. Kavani tinmasdan gol urmoqda va Evropa chempionatlarida bu borada eng yaxshi to'purar bo'lib turibdi. Himoya ham yuqorida ta'kidlab o'tganimizdek juda ishonchli o'ynamoqda. «Bordo»gacha bo'lgan o'yinlarda jamoa ketma-ket to'rtta uchrashuvda o'z darvozasidan to'p o'tkazib yubormagandi.

«Monako»da esa barchasi parijliklardanda ajoyib o'tmoqda. Bir mavsum davomida urilishi katta natija bo'lgan 64ta golni yanvardayoq zabt etib bo'lgan «Monako» ham so'nggi beshta uchrashuvda faqat va faqatg'alaba qozongan. Frantsiya chempionatining so'nggi ikki turida Jardim shogirdlari sakkizta to'p kiritishga muvaffaq bo'ldi, ularning 4tasi «Marsel» uyida kiritildi. Yuqorida eslab o'tganimizdek hafta o'rtasida «Monako» «Nansi»dan ustun kelib, liga kubogi finalida «PSJ»ga raqiblik qiladigan bo'ldi.

Ikkala jamoaning birinchi davradagi o'yinida «Monako» ishonchli tarzda, 3:1 hisobida g'alaba qozongandi. Parijda, yuqori sport formasiga kirgan «PSJ»ga qarshi, mavsumni o'ta barqaror o'tkazayotgan «Monako» uchrashuvi bizga juda ajoyib o'yinni va'da qilmoqda. «Monako» uchrashuvda g'alaba qozongan taqdirda, chempionlik uchun eng katta qadamini tashlagan bo'lardi. «PSJ» esa va nihoyat peshqadamlik mavqeiga qaytish uchun ham bu uchrashuvni yutishi kerak bo'ladi.

 

SASSUOLO – YuVENTUS (29 yanvar, 19:00, Match! Futbol 2)

«Yuventus» A seriyada hamon gegemonlik qilmoqda. Biroq bu yili turinliklarga «Roma» va «Napoli» jiddiy qarshilik ko'rsatmoqda. «Inter»ning so'nggi turlardagi ketma-ket g'alabalari ham ancha shov-shuvli chiqmoqda. Shu boisdan ham Allegri shogirdlari bir zum bo'lsada, e'tiborsizlik qilishlari mumkin emas. «Sassuolo» bilan o'yin ham shu jihatdan muhim deyish mumkin. 
«Fiorentina»dan uchralgan mag'lubiyatni hisobga olmaganda, «Yuventus»ning ishlari joyida deyish mumkin. Hafta o'rtasida jamoa «Milan»ni kubokdan chiqarib yubordi va yarim final yo'llanmasini qo'lga kiritdi. Chempionatda evrokuboklar uchun kurashni davom ettirayotgan «Latsio» mag'lubiyatga uchratildi.

«Sassuolo» esa aynan chempionatda o'z o'yinini topib olgan ko'rinadi. Jamoa «Chezena»ga imkoniyatni boy berib kubokdan chiqib ketdi. Biroq A seriyada so'nggi ikki uchrashuvda o'ta ishonchli g'alabalarni qayd qilib yaxshi sport formasiga kirib oldi.

Jamoalarning birinchi davradagi uchrashuvida turinliklar 3:1 hisobida g'alaba qozongandi. Sassuoloda kechadigan uchrashuvda ham Allegri jamoasi favorit sanalishi tabiiy. Biroq yaxshi seriya boshlab olgan «Sassuolo» bizga qiziqarli qarama-qarshilik bo'lishiga umid bermoqda.

 

SAUTHEMPTON – ARSENAL (28 yanvar, 22:30, Match! Futbol 1)

Bu haftada Angliya chempionati o'tkazilmaydi. Ammo kubok doirasida bir qator qiziqarli qarama-qarshiliklar bo'lib o'tishi kutilmoqda. Shunday to'qnashuvlardan biri Sauthemptonda bo'lib o'tadi.

Klod Pyuel jamoasining kayfiyati ajoyib deyish mumkin. Jamoa o'tgan haftada Liga kubogi finaliga yo'llanma oldi. «Avliyolar» «Liverpul»ni ikki uchrashuvda ham mag'lub etib fevral so'nggida bo'lib o'tadigan «Uembli»dagi finalga yo'llanma oldi. Barcha musobaqalarni qo'shib hisoblaganda so'nggi 5ta uchrashuvda «Soton» to'rtta g'alaba qozondi. Birgina «Byornli»ga qarshi uchrashuvni hisobga olmasa, qolgan to'rtta uchrashuvda o'z darvozasidan birorta ham to'p olib chiqqani yo'q. «Arsenal»da ham hozircha barchasi yaxshi ketmoqda. Jamoa so'nggi beshta uchrashuvning 4tasida g'alaba qozongan. APLning so'nggi turida jamoa juda asabiy ruhda o'tgan uchrashuvda katta qiyinchiliklar bilan bo'lsada «Byornli»dan ustun keldi. Ammo uchrashuvdagi nomaqbul harakatlari sabab Venger 4ta uchrashuvga diskvalifikatsiya qilindi va bu uchrashuvda ham u jamoasiga stadiondan turib yordam berish imkoniyatiga ega bo'lmaydi.

Kubokda, ayniqsa Angliya kubogida istalgan natijani kutish mumkin. Nom jihatdan londonliklar favorit ko'rinishi mumkin. Ammo mezbon sifatida harakat qiladigan «Sauthempton» odatda osonlik bilan raqibiga yon beravermaydi. Shanba kuni bizni o'ta qiziqarli uchrashuv kutib turgani shubhasiz.

Teglar: frantsiyada, uchrashuvi, «real», «sosedad»ga, qarshi, uik-endning, boshqa, muhim, uchrashuvlari, anonsi,
← OldingaOrqaga →