Hakamlar yana «Barselona»ga qarshi, «Hoffenhaym» ertagining poyoni va uik-endning boshqa muhim voqealari

Yakuniga etgan hafta voqealarga boy bo'ldi. Ispaniyadagi shov-shuvlar, Angliyadagi futbol shoulari, Italiyadagi etakchilarning muvaffaqiyatsizliklari... Tribuna.Uz uik-endning eng esda qolarli voqealarini eslab o'tishga qaror qildi.

Yana jabrdiyda rolida «Barselona»

«Golni aniqlash texnologiyasi? Ispaniyaga bu qimmatlik qiladi», degandi «Real»ga ishqibozlik qilishini yashirmaydigan La-liga prezidenti Tebas. O'tgan haftaning yakuni Ispaniya chempionati tashkilotchilariga mablag'dan jihatidan emas obro' jihatdan yaxshigina qimmatga tushdi, deyish mumkin. «Betis»ga qarshi uchrashuv bosh hakam Ernandes Ernandes «Barselona»ning chiziqni bir metr kesib o'tgan golini hisobga olmadi. Bu esa tanqidchilarning keskin munosabatlariga sababchi bo'ldi. «Barselona» bosh murabbiyi Enrike bu borada ehtiyotkorroq fikr bo'ldirgan bo'lsada, hakamlarga yordam zarurligini eslab o'tdi.

Bu bilan Ispaniyada hakamlik mavzusi yopilib qolmadi. Chempionlik uchun yana bir da'vogar «Sevilya» futbolchisi Parexa ikkinchi daqiqadayoq qizil kartochka bilan siylandi. Natijada jamoa Barselonadan mag'lubiyat bilan qaytdi. Bundan esa  «Real» unumli foydalanib qoldi. «Sosedad»ni yirik hisobda mag'lub etgan madridliklar bitta kam uchrashuv o'tkazgan holda raqiblarini 4 ochkoga ortda qoldirib ketmoqda.

Jilovlanmagan Angliya

Angliya tur o'yinlari o'tkazilmagan bo'lsada, kubok bahslarida qiziqarli uchrashuvlar bo'lib o'tdi. Inglizlarga xos bo'lgan o'yinlar evaziga bir qator kutilmagan natijalaar qayd etildi. Ularning ichida eng e'tiborlisi «Liverpul»ning o'z uyida «Vulverhempton» ga yutqazganini aytish mumkin. Uch kun ichida Klopp shogirdlari ikkita kubokdan ham chiqib ketishga ulgurdi. Jamoada o'yinida keskin pasayish kuzatilmoqda. Yil boshidan buyon o'tkazilgan sakkizta rasmiy uchrashuvning faqat bittasidagina g'alaba qozongan «mersisaydliklar» barcha davrlardagi antirekordlarini yangiladi.

Kubokdagi syurprizlar shu bilan tugab qolgani yo'q. «Chelsi» va «Manchester Siti» kabi etakchilarda barchasi joyida bo'lishi mumkin, lekin misol uchun «Tottenhem» keyingi bosqichga chiqishi uchun 97-daqiqa harakat qilishiga to'g'ri keldi. Uch marta hisobda ortda bora turib, g'alabani ilib ketgan jamoaning raqibini kim deb so'rasangiz aytishimiz mumkin — 3 divizion vakili, kamtargina «Uikom». 

Kubokning sensatsion natijalari shu qadar ko'p bo'ldiki, biri qolib, ikkinchisi muxlislarni hayrat ko'chasiga etakladi. Amaldagi finalchi «Uotford»ning «Hall» va «Nyukasl»ning quyi divizion jamoalariga yutqazib, musobaqani tark etgani ham hech nima emas. Kubok tarixida ilk marta Angliya beshinchi divizionining ikki jamoasi 1/8 finalgacha etib keldi. Yaqin o'tmishda ham premer-ligada peshqadamlarga haqiqiy boshog'rig'i bo'lib kelgan «Lids» qurilishda usta bo'lib ishlab, bo'sh vaqtida futbol o'ynab turadigan Kollinz familiyali quruvchining penaltidan kiritgan goli tufayli kubokdan chiqib ketdi. «Satton» bu g'alabani muxlislari bilan stadionda nishonladi.

Poyoniga etgan «qishloqilar» ertagi

Germaniya chempionatining 18-turiga kelib, Evropadagi eng kuchli chempionatlarda mag'lubiyat nimaligini bilmay kelayotgan yagona jamoa bo'lib turgan «Hoffenhaym» oxir-oqibatda birinchi mag'lubiyatini «Leyptsig»dan qabul qilib oldi. Shunday qilib Top-5da chempionatda mag'lubiyatga uchramagan jamoa qolmadi.

«Bavariya» esa g'alabali yurishini davom ettirdi. Ammo Germaniyaning bu ikki etakchisiga munosib qarshilik ko'rsatishni «Borussiya» Dortmund eplay olmayapti. Bu safar Tomas Tuxel sobiq jamoasiga qarshi o'yinning so'nggi daqiqalarida g'alabani qo'ldan chiqardi.

«Qamchi olgan» zebra va «Inter»

Italiya A seriyasida chempion kim bo'ladi degan savolga mavsum boshidayoq javob berish mumkin. Ammo ikki yildirki mamlakatda «Yuventus»ning ma'lum muddat pasayishidan foydalanib qolishi mumkin bo'lgan jamoalar topiladi, biroq bu ham uzoqqa cho'zilmaydi.

A seriyaning 22-turini ham shunga qiyoslash mumkin. «Yuventus» bir qarashda raqiblariga imkoniyat berayotgandek ko'ringandi. Ammo shu turda jamoaga raqobat qilishi mumkin bo'lgan bir yo'la to'rtta ta'qibchi ham ochko yo'qotdi. «Napoli» o'z uyida autsayder bilan durang o'ynagan bo'lsa, «Milan», «Roma» va «Latsio» o'z uchrashuvlarida birorta ham ochko to'play olishmadi. «Yuventus» esa «Sassuolo» uyida mehmon bo'lib, ishonchli g'alabani qo'lga kiritdi va qaysidir ma'noda chempionlik uchun kurash masalasini kun tartibidan olib tashladi.

Ammo yuqorida biz sanagan to'rtta jamoa barqaror futbol ko'rsata olmayotgan bo'lsa ham, yaxshi ot kabi mavsum boshida ko'rinmagan «Inter» shiddat bilan oldinga intilmoqda. Sobiq murabbiy bilan 15 uchrashuvda 21 ochko to'plagan «neradzurri» shuncha ochkoni keyingi etti turning o'zida to'plab tashladi. Ketma-ket etti g'alaba jamoaga 4-o'ringa ko'tarilib olish imkonini berdi. Kim biladi, deysiz Pioli va Ko shu tempda davom etsa, balki aynan ular «qamchi olgan» zebrani quvib etishni uddalar?

O'ziga o'xshamagan Parij va Monako

Uik-endning afishasiga qarab eng jarangdor uchrashuvi deb qaralgan «PSJ» va «Monako» jamoalari uchrashuvini ko'rganlar o'yindan ko'ngli to'ldi deyish qiyin. Evropaning eng sermahsul ikki jamoasi o'rtasidagi uchrashuvda birinchi gol o'yinning so'nggi daqiqalarida kiritilganidan ham buni tushunib olish mumkin.

Bundan esa «Nitstsa» foydalanib qoldi. O'z uyida «Gengam»ni qabul qilgan jamoa bu safar Balotelli ko'magida ishonchli g'alaba qozonib, yana peshqadamlik mavqeiga qaytdi.

O'xshashi yo'q Afrika

Afrika millatlar kubogi o'zining sensatsiyalari bilan har doim boshqa qit'a chempionatlaridan keskin farq qilib kelgan. Bu yilgi musobaqada Kot-d‘Ivuar yoki Jazoir kabi terma jamoalarning guruh bosqichidanoq ortga qaytib ketishi bunga isbot bo'la oladi. Chorak final oldidan musobaqa favoriti sifatida qaralgan Senegal uchun ham bu bosqich so'nggisi bo'lib qoldi. Ularni mag'lubiyat etgan Kamerundan boshqa, Burkino-Faso, Gana va Misr terma jamoalari g'oliblik uchun kurashni davom ettiradigan bo'ldi. Fevralning dastlabki ikki kunida bo'lib o'tadigan o'yinlar orqali bosh sovrin uchun kurashadigan ikki terma nomiga aniqlik kiritiladi.

«Shapokoense» — iroda degani

Aviahalokatdan roppa-rosa 2 oy muddat o'tib, Braziliyaning «Shapokoense» jamoasi Santa-Katarina shtati chempionati doirasida «Internasional» Lajis klubini mag'lub etdi. Bu mash'um fojiadan keyin qayta tashkil qilingan jamoaning birinchi g'alabasi edi.

Teglar: hakamlar, yana, «barselona»ga, qarshi, «hoffenhaym», ertagining, poyoni, uik-endning, boshqa, muhim, voqealari,
← OldingaOrqaga →